Gürcüstanda bir neçə ay gözlədikdən sonra 15 mart tarixində
koronavirusa qarşı ilk peyvənd vurulması mümkün oldu. Ölkə 13 mart
tarixində COVAX-platformasının vasitəsilə 43 200 doza AstraZeneka
peyvəndi alıb.
İlkin mərhələdə COVİD-19-a qarşı peyvənd səhiyyə sektorunda işlə
təmin olunmuş bütün şəxslərə – həkim, tibb bacısı, sanitar,
laborant, stomatoloq, ictimai səhiyyə mütəxəssisi, epidemioloq,
inzibati işçilərə (menecer, sürücü, qeydiyyatçı və s.) vurulacaq.
Məlum olur ki, həkimlər arasında da əksəriyyəti şübhə içindədir və
peyvənd vurdurmağa hazır deyillər. Bu etimadsızlığın hansı əsası
var, peyvənd barədə hansı məlumatlarımız var, peyvəndin hansı yan
təsirləri mövcuddur, təsiri necədir və hansı nəticəni gözləməliyik
– “Marneuli” radiosunun bu suallarına allerqoloq-immunoloq Bidzina
Kulumbekov cavab verir.
– 13 mart tarixində Gürcüstan “AstraZeneka” peyvəndini qəbul edib.
Bu bizim ölkə üçün nə deməkdir, hansı nəticəni gözləməliyik?
– Ölkələr peyvənddən bir illik faciənin, baş vermiş
pandemiyanın bitməsi olmasa da, azalmasını gözləyirlər. Virusun
yayılmasının elə potensialı var ki, bəşəriyyət heç nə ilə ona qarşı
çıxa bilmir. Ya ildə üç dəfə üç ay müddətinə ölkəni bağlamalısan və
yarım il əhalini qapamalısan, ilin ikinci yarısında buraxmalısan,
sonra yenə qapamalısan. Yaxud peyvənd kifayət qədər təsirli
olmalıdır və sürətlə vurulmalıdır. Vaksinasiya prosesi başlayıb,
ancaq əgər təxminən 8 ay ərzində yaşlı əhalinin 60-70% -nə
vurulmazsa, o zaman mənasını itirir, bu heç də böyük məqam
olmayacaq. Əsas odur ki, yalnız peyvənd vurmağa başlamayaq. Hər gün
mühümdür, indi bunu uğurla davam
etdirməliyik.
– Peyvəndlərin qısa zamanda hazırlanmasına görə onun təhlükəsizliyi
ilə bağlı çox söz-söhbət yaranıb. Tibb işçilərinin bir qismi də ona
şübhə ilə yanaşır. “Astrazeneka” peyvəndi nə dərəcədə
təhlükəsizdir?
– Bütün ölkələrdə aparılan müşahidə və monitorinqlərə
görə hər hansı vaksinin, həmçinin, “AstraZeneka”-nın adamlara ziyan
vurması qeydə alınmayıb. Dünyada hədsiz dərəcədə ölüm halları qeydə
alınmır. Yalnız İngiltərədə “Astrazeneka”-nın təxminən 11 milyon
dozası vurulub və ancaq Britaniyada bununla bağlı ölüm halının baş
verməsi qeydə alınmayıb. ABŞ-dan sonra Avropa kontingentində
Britaniya ən yaxşı elmi və tibbi texnologiyalara malikdir. Ona görə
də bu düşüncə ilə, mən həkim olaraq baxıram, məlumatım var və qərar
verirəm ki, peyvənd vurdurum. Mən kiməsə nümunə olmaq üçün özüm
peyvənd vurdurmalıyam. Bunların hamısını başa düşdüm, gecə gündüz
bunu oxuyuram və qərar verdim ki, virusa yoluxmaqdansa, bu
peyvəndin mənim mühafizəm üçün daha çox təsiri
var.
– İlk əvvəl “Pfizer” peyvəndinin gətirilməsindən söhbət gedirdi.
“Astrazeneka” isə kifayət qədər deyil. Müvafiq olaraq sabah başqa
peyvəndin gətirilməsinə ehtiyac yarana bilər. Siz hansı şirkətin
peyvəndini daha təsirli hesab edirsiniz?
– Peyvəndlərin təsirliliyi faizlərlə
qiymətləndirilərsə, “Pfizer” 94%,”Moderna” 95%, “Astrazeneka”
təxminən 70%-dir. Baxır hansı ştamma təsir göstərir. Məsələn, hər
il vurduruğumuz qrip vaksininin təsirliliyi təxminən 40%-dən 50%-ə
qədərdir. Qrip peyvəndi vurulmuş adam qripə yoluxacaq, ancaq
xəstəxanaya düşmək və ölüm təhlükəsi yoxdur. Yüksək faizlə müdafiə
edir, ancaq xəstələnməkdən qoruya bilmir. “Astrazeneka”, “Moderna”,
“Pfizer” yaxud “Conson&Conson” da eynidir. Ölüm və ağır
xəstəliklərdən bunlar da qoruyur. Ölümdən 100% qoruyurlar. (Peyvənd
vurulmuş heç bir adamda korona səbəbindən ölüm halı qeydə
alınmayıb. Red). Ağır xəstəlikdən demək olar ki, 90% qoruyur. Ona
görə də bu iki komponentdə “Astrazeneka”, “Moderna” və “Pfizer” də
eyni təsirlə xarakterizə olunur.
– Gürcüstan hökumətinin hazırladığı peyvəndin bölünməsi sxemi nə
dərəcədə təsirlidir?
– Gürcüstan hökuməti peyvəndin bölünməsini müəyyən edə
bilməz. Onlar Dünya Səhiyyə Təşkilatının Platforması ilə birbaşa
danışıqlar aparırlar. Bizə başqa vaksin verən heç kim yoxdur. Onlar
nə zaman desələr ki, bizim platformada bu peyvənd var və kvota ilə
ayrılmış şəkildə sizə bu qədəri düşür, onların verəcəyi peyvəndi
alacağıq. Gürcüstan hökumətindən bunu soruşan da
yoxdur.
– Necə düşünürsünüz, Gürcüstanda peyvənd prosesi rüşvət, yaxud
qaydalardan yan keçmək şansı yaradırmı? Məsələn, həkimlərin
yaxınlarına və ya nüfuzlu adamlara peyvənd vurulması?
– Əlbəttə, belə şanslar var. Oxşar faktlar Amerikada,
İspaniya da qeydə alınıb. Yüksək vəzifəli hərbçini ümumiyyətlə
işdən azad ediblər. Belə risk var və dövlət bunu vicdanlı şəkildə
idarə etməlidir.
– Gürcüstan hökumətini vaksinasiya prosesi və ya peyvənd
kampaniyası baxımından necə qiymətləndirirsiniz? Nə dərəcədə
effektiv işləyiblər?
– Əlbəttə, hər gecikmiş gün və saat bizim üçün
mühümdür. Ölkədən tələb edirdik ki, Avropanın aparıcı ölkələri kimi
peyvəndə məhz bu pillədən başlasın. Bu yanvardan mühüm olacaqdı. İş
olduqca çoxdur. Bu günə olan göstərici, məsələn deyir ki,
Gürcüstanda rəsmi olaraq qeydiyyatdan keçmiş 75 000 tibb işçisindən
1700 nəfəri qeydiyyatdan keçib və peyvənd vurdurmaq istəyini
bildirib (14 mart tarixinə olan məlumata görə, red). Bu olduqca
acınacaqlıdır. Bu göstərir ki, tibb sahəsinin nümayəndələri
arasında da təhsil səviyyəsi aşağıdır. Onlar alimlərə inanmır.
Dövlətin böyük güc göstərməsi vacibdir. Məlumatlandırma kampaniyası
və görüşlər keçirməlidir. Gecə gündüz bu barədə danışılmalıdır.
İndi bu məqamda bundan vacib heç nə yoxdur. Heç bir partiyalılıq və
siyasət olmamalıdır. Bu dövlət işidir və buna böyükdən kiçiyə hamı
qoşulmalıdır. Başqa cür 5000 adama peyvənd vurulması bizə heç nə
verməyəcək. Pandemiya yenə davam edəcək və peyvənd olunmamış
adamlar yenə xəstəxanaya düşəcəklər.
– Gürcüstana peyvəndin gec gətirilməsi koronavirusun yayılmasına
hansı təsiri göstərir?
– Əlbəttə təsir göstərir. Peyvəndə sürətlə başlanılarsa
və çox adama vurularsa, bu növbəti pandemiya dalğasından
qorunacağımızın zəmanəti olacaq. Bunlar hamısı isə ölkənin
iqtisadiyyatı və tam yaşam şəraitinə qayıtması üçün çox mühüm
olacaq. Əgər bu olmazsa, yalnız xalqın maska taxmasına, vicdanın
ümidinə qalacağıqsa, biz görürük ki, maska taxma göstəricisi
72%-dən 43% düşüb. Əhali inanmır və öz bildiyi kimi hərəkət
edir.
– Peyvənd necə təsir göstərir və real olaraq insan sağlamlığına hər
hansı ziyan vura bilərmi?
– Peyvənd dərmandır və bütün dərmanlar kimi peyvəndin
də yan təsirləri var. Çiyin ağrıları, istilik, zəiflik. Bunlar
hamısı bir neçə günə keçib gedir. Bu ən çox baş vermiş
reaksiyalardır və peyvənd vurulmuş 10 nəfərdən 60-70%-də qeydə
alınır. Ağır, şişmə, əzələ ağrıları, istiliyin qalxması 24-48 saat
ərzində itir.
– Belə bir söhbət də yayılıb ki, peyvənd reporduktiv sağlamlığa
təsir göstərir. Bunun hansı əsası var?
– Reproduktiv sağlamlıqla bağlı Amerikalı alim
bildirmişdi ki, deyək, peyvəndin vurulduqdan sonra orqanizmdə
sintez etdiyi zülal, onun yaratdığı yad cisimlər plasenta zülalı
ilə də eyni şəkildə mübarizə apara bilərlər. Plasentanın zülalla
mübarizəsi sonsuzluq və s. yarada bilər. Ancaq heç bir elmi təsdiq
və sübut hələ ki, orada oxşarlığı təsdiq etmir. Bu konspirasiya
nəzəriyyəsinin bir qismi, alimlərin səhv yönəlməsi və
vicdansızlığıdır ki, buna əsas olub.
– “Mən artıq koronavirus keçirmişəm və mənə peyvənd lazım deyil” –
bu mifdir, yoxsa reallıq?
– Bir halda ki, peyvəndlər məhduddur, koronavirus
keçirmiş adamlar keçirməyənlərə, həmkarlarına, dostlarına güzəşt
edə bilər. Çünki dünyada üç ay ərzində yenidən yoluxma qeydə
alınmayıb. Ona görə əlbəttə, peyvənd vurdura bilərlər. Amerika və
İngiltərədə heç kim gözləmir, ciddi xəstəlik bitən kimi iki üç
həftədən sonra peyvənd vurdura bilərlər. Bizim ölkədə belə qərar
veriblər ki, vaksin azdır və əgər adam bir ay əvvəl virus
keçiribsə, onun koronavirusa yoluxma riski yoxdur. Ona görə də belə
halda 120 gün gözləmək və peyvənd vurdurmamaq
olar.
– Niyə uşaqlara Covid-19 vaksini vurulmur?
– Uşaqlarda xəstəliyin bütün kateqoriyasında və ağırlıq
baxımından ölüm göstəriciləri ən aşağı səviyyədədir. Praktiki
olaraq dünyada ölmüş iki milyon adam arasında uşaqların sayı
nadirdir. Ona görə də hesab edildi ki, peyvənd vurma prosesi
sürətlə aparılmalıdır və həssas qrupları, yaşlı əhalini, xroniki
xəstəlikləri olanları və səhiyyə işçilərini əhatə etməyimiz
mühümdür. Onların kovidə yoluxma riski daha yüksəkdir. Müvafiq
olaraq bu araşdırmalara uşaqlar qoşulmamışdı ki, vaxt qazansınlar.
Araşdırmalar uzun zaman aparılırdı. Uşaqlar hədəf olaraq
götürülmədi. Ancaq çox şirkətlər araşdırmaya başlayıb və
sentyabr-oktyabrda uşaqların yaş həddinin minimum 12 yaşdan yuxarı
olması planlaşdırılır.
– Peyvənddən sonra pandemiyaya qədər olan həyata qayıtmaq mif yoxsa
reallıqdır?
– Dünya əhalisinin peyvənd səviyyəsini yaratmaq üçün
70% ehtiyac var və əgər dünya əhalisinin 70%, yəni 5 milyard adam
peyvənd vurdurarsa, dünyada gündəlik 8 milyon vaksin hazırlanırsa,
10 milyard vaksin nə zaman hazırlanacaq? Bu proses
sürətləndirilməsə, buna illər lazım ola
bilər.
– Peyvənd koronavirus pandemiyasıdan xilas olmanın yeganə
yoludurmu?
– Dünyada koronavirus infeksiyasını yəqin ki, təkcə
peyvənd bitirə bilməyəcək. Biz bütün qocalara, əsasən 18-65 yaş
arası xroniki xəstəliyi, diabet, artıq çəki, ürək, ağciyər
xəstəlikləri olan adamlara peyvənd vursaq, bu deməkdir ki, bizim
ölkədə gündə 10 000 yoluxma da olsa, xəstəxanalarda hədsiz sayda
xəstə və ölüm halları olmayacaq. 10 000 yoluxma halında belə ölkədə
lokdaun elan etməyə ehtiyac qalmayacaq. Adi qrip kimi olacaq və
orta yaşlı adamlar bunu əsasən “ayaq üstə” keçirəcəklər. Yalnız
təcrid vacibdir. Mən düşünürəm ki, ilin sonundan bu normal həyata
davam etmək üçün əsas olacaq. Ancaq pandmeiyanın bitməsinə yəqin
ki, səbəb ola bilməz.
Böyük Britaniya dünyada “Astrazeneka” şirkətinin və Oksford
Universitetinin birgə hazırladığı vaksindən istifadə etməyə
başlayan ilk ölkədir. Gürcüstana ilk əvvəl “Pfizer” vaksininin
fevral ayında gətiriləcəyi anons edilmişdi. Ancaq bu neçə dəfə
təxirə salındı. Xəstəliklərə Nəzarət Milli Mərkəzinin peyvəndləmə
planına əsasən Gürcüstanda 15 mart tarixində 82 qurumda peyvəndin
vurulmasına başlanılıb. 17 mart tarixindən sxemə Marneuli də
qoşulacaq. Marneulidəki “Geo Hospitals” klinikasına 1000 doza
“Astrazeneka” verilib. İndiki mərhələdə yalnız 15 nəfər peyvənd
vurdurmaq istəyini bildirib. Səhiyyə Nazirliyinin məlumatına görə,
Covax platformasından Gürcüstan üçün 129 600 “Astrazeneka”, 29 250
doza “Pfizer” ayrılıb və vaksinlər may ayının sonuna qədər ölkəyə
gətiriləcək.