Pandemiyanın vurduğu ziyan və kənd təsərrüfatından götürülən gəlir
10:55 / 30.03.2021
Fermerlərin sərt karantin şəraitində bağlanmış Marneulidə etiraz
aksiyası keçirməsindən və meriyadan məhsulun satışında onlara
yardım etməsini tələb etmələrindən bir il ötdü.
Tonlarla xarab olmuş və atılmış məhsul, ödənilməmiş kreditlər və
gəlirsiz qalmış ailələr. Pandemiya bələdiyyədə ilk və ən güclü
zərbəni məhz fermerlərə vurdu. Bir ildən sonra kənd təsərrüfatı
sahəsində başqa növ problemlər yarandı, ancaq müsbət məqamlar də
var.
Pandemiyanın gətirdiyi ilk qorxu ac, çörəksiz qalmaq idi.
Nadiradzelərin ailəsi də istisna olmayıb. Besarion, onun qardaşı və
xalası oğlu öz ailələri üçün ərzaq becərməyə qərar veriblər.
Düşünüblər ki, pulları olmasa da, qidaları olacaq. Sonra
fikirləşiblər ki, ailə işini biznesə çevirsinlər. Biznesi isə
bio-təsərrüfat istiqamətində aparıblar.
“Əvvəlcə ailəmiz ac qalmasın deyə, qida və ərzaq
qıtlığı olardısa, ailəmiz üçün ehtiyat toplamaq məqsədi ilə
başladıq. Bir halda ki, birgə gücümüzlə bu işə başladıq, biznes
ideyaya çevrildi. Axşamlar oturanda nə edək, necə edək deyə söhbət
edirdik. Xalam oğlu bir ideya təklif etdi. Qardaşımla mən də
razılaşdım. Bir-birimizə dəstək olaraq hər şeyi
etdik”, – Besarion bildirdi.
2020-ci ili əsasən bazarı araşdırmağa həsr ediblər. Yekunda
quşçuluq və kartofçuluğa qərar veriblər. Əsasən ailələri üçün başqa
tərəvəzlər də əkiblər. Amma satış üçün də tərəvəz qalıb. Məhsulun
bir qismini küpələrdə saxlayıblar və konservləşdirilmiş şəkildə
satıblar. Marneulidə kənd təsərrüfatı böhranı fonunda atılmış dəqiq
addımın nəticəsini görüblər.
Nadirazdelərdən fərqli olaraq Tea və Xatuna Kutateladze bacıları
bio-təsərrüfatı koronavirus yayılana qədər yaradıb. 2017-ci ildə
Marneulidə yeddi hektar torpaq sahəsi alıb, qaragilə və moruq
əkiblər. Tea Kutateladze “Marneuli” radiosu ilə söhbəti zamanı
bildirdi ki, pandemiya onların təsərrüfatına problem yaradıb.
Bələdiyyənin bağlanması sahəyə gedib-gəlməkdə çətinlik yaradıb.
Buna görə də bu il yaz işlərinə başlamaq üçün bir neçə ay
gecikiblər. Buna baxmayaraq Tea deyir ki, təsərrüfata
koronavirusdan çox ölkənin səhv planlaşdırdığı kampaniya ziyan
vurub.
“Real olaraq ötən il tam satış olmadı, ancaq deyə
bilmərəm ki, satışda bizə yalnız kovid mane oldu. Ümumiyyətlə
2019-cu ildə də böyük problem var idi. Xüsusən də qaragiləni
yetişdirmək problemli idi. Çünki dövlət bu proqramları artıq
dərəcədə “piar” etdi. Çox adama məhsul əkdirdilər və onlara dedilər
ki, mütləq saxlamaq üçün müəssisə, soyuducu təsərrüfatı
yaradacağam. İxracda sizə kömək edəcəyəm və s. Çox adam bu ümidlə
əkib-becərdi və müvafiq olaraq daxili bazar üçün hədsiz dərəcədə
çox məhsul əldə etmiş olduq. Heç ixrac da edə bilmirlər, heç bir
qurum işləmir. Yalnız biri işləyir, o da özəldir və az miqdarda
məhsul qəbul edir. Xalq buna görə artıq bu sahəni tərk edib.
Məsələn, ötən il məhsulu toplamaq neçəyə başa gəlirdisə, o qiymətə
də satırdıq”.
Tea hesab edir ki, Kəndlərin İnkişafı Agentliyi tərəfindən elan
edilmiş proqram səhv tərtib edilib. Əhalinin qaragiləyə necə qulluq
göstərilməsi barədə real məlumatı yoxdur.
Kutateladzelər qaragilə və moruğu “Gələcəyini qur “ adlanan layihə
çərçivəsində əkiblər. Kəndlərin İnkişafı Agentliyi regionlarla
əlaqələr departamentinin rəhbəri Laşa Şalamberidze bildirdi ki,
qaragilə meyvəsinin maliyyələşdirilməsi komponentlərinə görə çox
sayda fermer bundan yararlanıb və Gürcüstan miqyasında onlarla
soyuducu təsərrüfat yaradıb. Fermerlər məhsulu saxlaya bilirlər.
Nazirlik fermerlər üçün qaragilə və moruq plantasiyalarının
yetişdirilməsini 100% maliyyələşdirir. Ancaq fermer maliyyə üçün
dövlətə müraciət etməzdən əvvəl bu kimi təsərrüfatın perspektivini,
mövcud riski və satış planını nəzərə almalıdır.
Laşa Şalamberidze kimi USAİD tərəfindən maliyyələşdirilmiş “artım”
layihəsinin rəhbəri Keti Çumburidze də hesab edir ki, fermer kiçik,
yaxud geniş miqyaslı təsərrüfat yaradan zaman bütün riskləri və
bazarı nəzərə almalıdır. Əhalinin yalnız Marneuli və Kvemo Kartli
regionunda deyil, bütün Gürcüstan miqyasında kənd təsərrüfatını
hansı növ dövlət, yaxud QHT proqramları ilə inkişaf etdirməyin
mümkün olacağı barədə məlumatı yoxdur.
Kəndlərin İnkişafı Agentliyinin Regionlarla Əlaqələr
Departamentinin rəhbəri “Marneuli” radiosunun “Aktual mövzu”
verlişində pandmeiya zamanı dövlət tərəfindən fermerlərə
göstərilmiş yardım barədə danışdı. Laşa Şalamberidzenin sözlərinə
görə ötən, il bələdiyyənin bağlanması dövründə hakimiyyət Marneuli
sakinlərinə məhsulun satışında fəal dəstək göstərib.
“Marneuli bağlanan kimi bizim daxili xidmətlər
buraxılış məntəqələrində dururdu. Onlar bələdiyyədə hansı miqdarda
məhsul gətirilməsini və nə qədər məhsul çıxdığını təfərrüatı ilə
qeyd edirdilər ki, məhsulun satışında maneə yaranmasın. Biz faktiki
olaraq hansı kəndə nə qədər məhsul lazım olduğuna kənd səviyyəsində
nəzarət edirdik. Dövlətin idarə mərkəzi, yəni qərargahla birgə
həmin məhsulların ehtiyatı həyata keçirilirdi. Marneulidə fermerlər
bizə müraciət edən zaman onlara hərəkət etməkdə də yardım edirdik.
Təsərrüfata, müxtəlif yerlərə aparırdıq. Fermerlərə buraxılış kartı
da hazırlayırdıq.”
Gürcüstan hökuməti koronavirusa görə dəymiş ziyanın azaldılması
məqsədi ilə kənd təsərrüfatında böhrana qarşı plan hazırladı və
fermerlər üçün müxtəlif növ yardım təyin etdi. Kəndlərin İnkişafı
Agentliyindən “Marneuli” radiosuna verilən məlumata görə, 2020-ci
ilin 15 may tarixində Gürcüstan Ekologiya və Kənd Təsərrüfatı
Nazirliyi ilə “Socar Georgia Petrolium” MMC arasında “fermerlərə
güzəştli şərtlərlə yanacaq verilməsi barədə” müqavilə bağlanıb.
Qarşılıqlı əməkdaşlıq nəticəsində ötən il bütün ölkə miqyasında 156
800-dən artıq benefisiar 30 500 tona qədər aqro-dizel üçün endirim
kartları aldı. Marneuli bələdiyyəsində təxminən 3 860 fermerə
ümumilikdə 1 613 710 litr dizel üçün endirim kartı verilib. Buradan
ümumilikdə 558 790 litr dizel yanacağı istifadə olunub. Eləcə də
2021-ci ilin 1 fevral tarixindən 10 mart tarixinə qədər olan dövrdə
2600-ə yaxın benefisiar 1500 tondan artıq aqrodizel üçün endirim
kartı alıb. Həmin benefisiarlardan 37 Marneulidəndir. 600-ə yaxın
fermer 1 litr yanacaq üçün 1 lari dəyərində güzəştdən artıq
faydalanıb və 40,5 tondan artıq dizel istifadə olunub. Böhrana
qarşı plan başqa növ yardımları, misal üçün, kənd təsərrüfatı
texnikasının qarşılıqlı maliyyələşdirilməsini nəzərdə tuturdu.
Marneuli bələdiyyəsində həmin güzəştdən beş fermer yararlanıb.
Benefisiarlardan biri bir illik kənd-təsərrüfatı məhsulları üçün
suvarma sisteminə görə qarşılıqlı maliyyə əldə etdi və quraşdırdı.
Gürcüstan miqyasında 2 794, Marneulidə is 17 fermer bir hektar
torpaq sahəsinə 200 lari dəyərində subsidiyanı nəzərdə tutan “Bir
illik məhsulların maliyyələşdirilməsindən” faydalandı.
“Marneuli” radiosu yerli özünüidarənin Marneulili fermerlərə hansı
növ dəstəyi nəzərdə tutduğu ilə də maraqlandı. Meriyandan verilən
məlumata görə, meriyanın kəndlərin inkişafı istiqamətində heç bir
proqramı yoxdur. Çünki bu tamamilə Kənd Təsərrüfatı Nazirliyinin
səlahiyyətindədir. Yerli özünüidarə isə əlavə proqram və layihələr
tərtib edə bilmir.
Kəndlərin İnkişafı Agentliyinin rəsmi veb-səhifəsində yayımlanmış
məlumata görə kənd təsərrüfatı istiqamətində indiki mərhələdə yeddi
proqram davam edir. Onlar arasında aqro-dizelə güzəşt, məhsul yığan
kənd təsərrüfatı texnikasının qarşılıqlı maliyyələşdirilməsi,
aqro-sığorta, güzəştli aqro-kredit və s. proqramlar var.
Bu fonda fermerlərin
problemlərinin bir qismi hələ də həll olunmmış
qalır.
Gürcüstanda fermerlərə aqro-kredit müddətini uzatmaq imkanı verəcək
vahid proqram yoxdur. “Gürcüstan Bankından” “Marneuli” radiosuna
bildirdilər ki, fermer fərdi müraciət əsasında kredit müddətini
uzada bilərdi. Şərtləri isə kredit məmuru müəyyən etməli idi. Bu
məsələ fermerləri hələ pandemiyanın birinci dalğasından başlayaraq
narahat edir.
Əhali dövlət tərəfindən fermerlərə təklif olunan proqramlarla
yalnız gürcü dilində tanış ola bilər. Gürcüstanda yaşayan etnik
azlıqlara məlumat əlçatan deyil. Müvafiq olaraq onların bir qismi
hansı güzəştlərdən faydalanacağını və təsərrüfatını necə inkişaf
etdirəcəyini bilmir.