Problemlərin müəyyən edilməsi, həllinə yardım və başa düşülən dildə xidmətlər – qeyri gürcüdilli kəndlərdə yeni layihəyə başlanılıb
18:00 / 19.05.2021
Tərcüməçi tapmaq və pul ödəmək, kseroks axtarmaq və çaşqınlıq –
bunlar qeyri-gürcü dilli əhalinin dövlət xidmətlərindən
yararlandığı zaman aşmalı olduqları maneələrin kiçik siyahısıdır.
Nizami Əfəndiyev gürcü dilini bilmədiyinə görə, dövlət
xidmətlərindən yararlana bilməyən adamlardan biridir, ancaq Xuldərə
kəndinin icma mərkəzində tərcüməçi və başqa xidmətlər almaq mümkün
olduqdan sonra onun problemlərinin bir qismi öz həllini tapıb.
“Mənim üçün, əhali üçün bu xidmətin olması mühümdür. Nə
lazım olsa, hansısa sənəd gələrsə, oxuyur və bizi başa salırlar.
Məktub lazım olanda yazırlar. Məsələn, mən torpaq sahəsini
qeydiyyatdan keçirmək istəyirdim, müvafiq qanunvericilk əsasında
məktub yazdılar. Həm də bunların hamısı yaxındadır, əvvəl isə
rayona getməli olurduq”, – Nizami Əfəndiyev
bildirdi.
Marneuli və Qardabaninin daha altı kəndinin də Xuldərə kimi oxşar
xidmətlərdən yararlanmaq imkanı var. Yeni Düşüncə İnstitutunun
regional layihəsi çərçivəsində Xuldərə, Mollaoğlu, Aşağı Saral,
Ağməmmədli, Qasımlı, Algeti və Nəzərli əhalisi müxtəlif
xidmətlərdən pulsuz yararlana bilərlər. Layihənin müəlliflərindən
Ariz Daşdəmirov “Marneuli” radiosu ilə söhbəti zamanı bildirdi ki,
layihənin hazırlanması ideyası koronavirusa görə qeyri-gürcü dilli
kəndlərin daha çox qapanması və məlumatlandırılma baxımından
vəziyyətin pisləşməsindən sonra yaranıb.
“Əhali məlumatsızdır. Araşdırmalar zamanı aydın oldu
ki, əhalidə ailə həkimi barədə məlumat yoxdur. Pandemiya əhalini
çox qorxutdu. Biz onlara ərizə yazmaqda, tərcümədə, layihələrdə
iştirak etməkdə, müəllimlər imtahanı üçün qeydiyyatdan keçməkdə,
abituriyentlərə ixtisas seçməkdə və imtahan üçün qeydiyyatdan
keçməkdə, dövlət qurumları ilə ünsiyyət qurmaqda yardım edirik. Bu
bizim layihə çərçivəsində əhalinin yararlana biləcəyi xidmətlərin
qısa siyahısıdır.”
Mərkəzdə göstərilən xidmətlərdən əlavə layihə yeddi kənddə əhali
arasında sorğu aparılmasını da nəzərdə tutur. Sorğunun məqsədi
kəndlərin problemlərinin aşkar edilməsidir ki, daha sonra həmin
problemlərin həlli 2022-ci ilin büdcəsində nəzərə alınsın.
Yeni Düşüncə İnstitutunun “Covid-19-un Kvemo Kartliyə təsiri və
zərər çəkmiş əhalinin vəziyyətinin yüngülləşdirilməsi” regional
layihəsi ABŞ-ın Beynəlxalq İnkişaf Fondunun (USAİD) maliyyə dəstəyi
və Şərq-Qərb İdarə İnstitutunun (EWMI) ACCESS layihəsinin dəstəyi
ilə həyata keçirilir.