Tədbirdə iştirak edən Azərbaycan Respublikasının Diasporla İş üzrə
Dövlət Komitəsinin məsul əməkdaşı Nəriman Əliyev GAİM tərəfindən
görülən işləri yüksək qiymətləndirib.
O, həmçinin yeni layihələrlə bağlı fikirlərini bölüşüb, yeni icraçı
direktora və kollektivə uğurlar arzulayıb.
Bu günə qədər mərkəzdə icraçı direktor vəzifəsini GAİM-in idarə
heyətinin üzvü və həmtəsisçilərindən biri olan, şair, yazıçı,
publisist, tərcüməçi Rafiq Hümmət tuturdu. O, bu vəzifəyə 2020-ci
ildə təyin olunmuşdu. Rafiq Hümmətdən əvvəl isə bu vəzifəni Aygül
İsyayeva icra edirdi. O, bu vəzifəyə 2019-cu ildə təyin
olunmuşdu.
Qeyd edək ki, Gürcüstan Azərbaycanlılarının İnteqrasiyası Mərkəzi
2019-cu ilin 3 aprel tarixindən fəaliyyətə başlayıb. Mərkəzdə
tələbələrə Azərbaycan dili, gürcü dili, ingilis dili, Gürcüstan,
Azərbaycan və dünya tarixi, gimnastika və cüdo kursları, eləcə də
müxtəlif tədbirlər, maarifləndirici görüşlər keçirilir. Azərbaycan
Diasporla İş üzrə Dövlət Komitəsinin dəstəyi ilə yaradılan mərkəzin
məqsədi Gürcüstan Azərbaycanlılarının inteqrasiyasına dəstək
olmaqdır.
Orxan Pirverdiyev kimdir?
Orxan Pirverdiyev 23 may 1994-cü ildə Marneulidə anadan olub. O,
ilk təhsilini Marneulidə yerləşən 2 saylı ictimai məktəbinin rus
dilli bölməsində alıb. Orta təhsilini bitirdikdən sonra Pirverdiyev
ali təhsilini Tbilisi Dövlət Universitetinin Beynəlxalq Əlaqələr
fakültəsinin bakalavr dərəcəsində davam etdirib.
Daha sonra Texniki Universitetin magistr dərəcəsinə daxil olaraq,
dövlət idarəçiliyi fakültəsini bitirib. Orxan Pirverdiyev Qafqaz
Universitetində marketinq layihə meneceri, Gürcüstan bankında mikro
kredit mütəxəssisi, TBC bankda biznes kredit mütəxəssisi və s.
sahələrdə çalışıb. O, Gürcüstan prezident aparatında və digər yerli
və beynəlxalq təşkilatlarda təcrübə keçib.
Orxan Pirverdiyev Azərbaycan, gürcü, rus, ingilis, ispan və türk
dillərində bilir.