Bolnisi şəhərində hərbi təyyarə qəzaya uğrayıb, nəticədə pilot həlak olub.

Merinin Bolnisi inzibati ərazi vahidi üzrə nümayəndəsi Dimitri Modebadzenin “Marneuli” radiosuna bildirdiyinə görə, hadisə Bolnisi şəhəri yaxınlığında, hərbi bazanın yaxınlığında baş verib.

“Bolnisi şəhəri ərazisidir, təxminən hərbi baza ərazisindədir. Məndə olan məlumata görə, yüksək sürətlə uçan təyyarə alovlanıb, pilot katapult edə bilməyib və həlak olub. Təyyarə

yanıb”.

Merin Bolnisi inzibati ərazi vahidi üzrə nümayəndəsi Dimitri Modebadze bildirdi ki, Bolnisinin meri, Bələdiyyə Məclisinin üzvləri və digər rəsmi şəxslər hadisənin baş verdiyi əraziyə gediblər.

Müdafiə Nazirliyinin məlumatına görə, Müdafiə Qüvvələrinin Su-25 təyyarəsi qəzaya uğrayıb.

“Cari il iyulun 2-də aviasiya komponentinin cəlb olunduğu planlaşdırılmış hərbi təlimlərdən birində Müdafiə Qüvvələrinə məxsus uçuş aparatlarından biri qəzaya uğrayıb. Su-25 təyyarəsinin qəzaya uğraması nəticəsində Müdafiə Qüvvələrinin Aviasiya və Hava Komandanlığının pilotu Kaxaber Zurabaşvili faciəvi şəkildə həlak olub”, – Müdafiə Nazirliyinin bəyanatında qeyd olunur.

Müdafiə Nazirliyindən verilən məlumata görə, hadisənin baş vermə səbəblərinin müəyyən edilməsi məqsədilə Müdafiə Nazirliyinin müvafiq xidmətləri tərəfindən ətraflı araşdırma aparılır.

“Marneuli” radiosu hadisənin təfərrüatlarını araşdırır. Məlumat yenilənəcək.