Şri-Lankada hücum nəticəsində ölənlərin sayı 290-a çatıb
Şri-Lankada kilsə və mehmanxanalara hücum
nəticəsində ölənlərin sayı 290-a çatıb.
500
nəfərdən artıq adam isə yaralanıb.
BBC-nin yazdığına görə, ölənlər arasında xarici ölkə vətəndaşları
da var. Məlumata görə, baş vermiş hadisə ilə bağlı polis 24 nəfəri
saxlayıb, lakin 21 aprel hücumlarının arxasında kimin olduğu
hələlik məlum deyil.
Şri-Lankada partlayışlar bazar günü yerli katoliklər Pasxa
bayramını qeyd edərkən baş verib.
İlk partlayış haqqında məlumat bazar günü yerli saatla 8:45-də
yayılmışdı. Bundan qısa müddət sonra isə daha 6 partlayış baş
verdi.
Hücumların hədəfində Pasxa mərasiminin keçirildiyi üç kilsə də
olub. Bundan başqa bir neçə bahalı mehmanxanada da partlayışlar baş
verib.
Xarici mətbuatın yazdığına görə, partlayışların arxasında kimin
olduğu məlum deyil. Yerli polis saxlanılan 24 nəfərin adını da
açıqlamayıb. BBC-nin yazdığına görə, Şri-Lanka hökuməti
partlayışları kamikadzelərin həyata keçirdiyini düşünür.