Gürcüstan-Azərbaycan parlamentlərarası dostluq qrupunun üzvləri görüşüblər
Gürcüstan parlamentinin Gürcüstan-Azərbaycan
parlamentlərarası dostluq qrupunun üzvləri diasporla iş üzrə dövlət
komitəsində olublar.
"Marneuli" radiosu ONA-ya istinadən xəbər verir ki, bu barədə
Diasporla iş üzrə Dövlət Komitəsindən məlumat verir. Görüşdə
Gürcüstan Parlamentinin sədr müavini, Gürcüstan-Azərbaycan
Parlament Dostluq qrupunun sədri Zviad Dzidziquri, Gürcüstanın
ölkəmizdəki fövqəladə və səlahiyyətli səfiri Zurab Pataradze, Aqrar
məsələlər üzrə Komitə sədrinin birinci müavini, dostluq qrupunun
üzvü Gela Samxarauli, Diaspor və Qafqaz məsələləri Komitəsinin və
dostluq qrupunun üzvü Mahir Dərziyev, Xarici əlaqələr Komitəsinin
və dostluq qrupunun üzvü Ramaz Nikolaişvili, Gürcüstan
Parlamentinin beynəlxalq münasibətlər idarəsinin parlamentlərarası
əlaqələr şöbəsinin müdiri Ann Marcanidze, Azərbaycan-Gürcüstan
parlamentlərarası əlaqələr üzrə işçi qrupun rəhbəri, millət vəkili
Əflatun Amaşov iştirak ediblər.
Komitə sədri iki ölkə arasında dostluq və qardaşlıq
münasibətlərinin möhkəmliyi və inkişafından danışıb. Zviad
Dzidziquri səmimi qəbula görə Komitə sədrinə təşəkkür edib və
Azərbaycanla Gürcüstan arasında sosial-mədəni sahədə əməkdaşlıq
barədə geniş fikirlərini bölüşərək, iki olkə arasında
münasibətlərin ən yüksək səviyyədə olduğunu diqqətə çatdırıb.
Səmimi keçən görüşdə Azərbaycan və Gürcüstan diasporunun qarşılıqlı
əməkdaşlığından, parlamentlərarası əlaqələrin möhkəmliyindən və
diaspor fəaliyyəti ilə bağlı görülən işlər barədə ətraflı müzakirə
aparılıb. Müzakirələrdə müxtəlif layihələrlə bağlı təkliflər
səsləndirilib və bunların həyata keçirilməsində işçi qrupunun rolu
diqqətə çatdırılıb.