Azərbaycan nəşriyyatı Caliber.az-ın məlumatına görə, Fransa
istehsalı olan hərbi texnika,
konkret olaraq "Bastion" zirehli transportyorlar Ermənistana
Gürcüstan vasitəsilə çatdırılıb.
Nəşriyyata əsasən, 12 noyabr tarixində Poti limanına Acmat-ın
istehsalı olan çoxfunksiyalı fransız zirehli texnikası “Bastion”
gətirilib. Nəşriyyat məlumat verir ki, texnikanı Fransa şirkəti
ARQUUS göndərib. Caliber.az Poti limanında çəkilmiş foto və video
kadrları da yayımlayıb.
Azərbaycan Xarici İşlər Nazirliyi Fransa tərəfindən Ermənistana
zirehli texnikanın verilməsi haqqında yayılmış məlumata münasibət
bildirib və Fransanın hərəkətini qınayıb.
“Biz Fransa tərəfindən Ermənistana “Bastion” zirehli
texnika göndərilməsini qınayırıq. Qeyd olunan hərbi texnikanın
ötürülməsi 30 ilə yaxındır ki, Azərbaycan Respublikası ərazilərinin
bir hissəsini işğal altında saxlayan, təcavüzkar siyasətindən və
ritorikasından əl çəkməyən Ermənistanın hərbi potensialının və
destruktiv hərəkətlərinin gücləndirilməsinə xidmət edir.
Özünü beynəlxalq hüququn təbliğatçısı, regionda sülh və sabitliyin
tərəfdarı kimi təqdim edən Fransanın bu addımları regionda
qarşılıqlı tanınma, suverenliyə, ərazi bütövlüyünə hörmətə
əsaslanan münasibətlərin normallaşmasına yönəlmiş səyləri ciddi
sual altında qoyur, dövlətlərin bütövlüyünü, beynəlxalq sərhədləri
pozur, vəziyyətin gərginləşməsinə xidmət edir.
Fransanın Azərbaycana qarşı iftiraları və regionda destruktiv
hərəkətləri fonunda Ermənistanın militarizasiyası siyasətinə xidmət
edən bu addımlar Fransanın regionda yanlış maraqları rəhbər
tutduğundan xəbər verir.
Ermənistan və Fransa regionda militarizasiya siyasətinə son
qoymalıdır. Bu ölkələr, nəhayət, başa düşməlidirlər ki, regionda
sülh və əməkdaşlığın alternativi yoxdur.
Biz beynəlxalq ictimaiyyəti işğalçı siyasəti ilə tanınan
Ermənistanı silahlandırmaqdan çəkinməyə, regionda sülhün və rifahın
bərqərar olmasına mane olan bu kimi qanunsuz hərəkətləri
dayandırmağa və pisləməyə çağırırıq”, - deyə
Azərbaycanın Xarici İşlər
Nazirliyinin mətbuat katibi Ayxan
Hacızadə bildirib.
Erməni mətbuatında Ermənistanın Müdafiə Nazirliyinin cavabı
yayımlanıb, cavaba görə, qurum “Ermənistan və Fransa arasında
müdafiə sahəsində əməkdaşlıq haqqında rəsmi açıqlamalar istisna
olmaqla” ictimaiyyətə “əlavə məlumat verə bilməz”.
Fransanın “Ouest France” nəşri yazır ki, “Bastionlar” əvvəlcə
Ukrayna üçün nəzərdə tutulubmuş, lakin Kiev onların artilleriya
atəşi və tank əleyhinə raketlərdən daha az müdafiə olunduğuna
inanırdı.
“APM Terminals Poti” Azadlıq Radiosunun sualına cavab olaraq
Gürcüstan üzərindən Ermənistana “konkret yük”-ün gətirildiyini
təsdiq edib:
"Vurğulamaq istərdik ki, bu konkret halda yük Avropa
Birliyi ölkəsindən - Fransadan gəlib və Ermənistana - sanksiyaya
məruz qalmayan ölkəyə yönəlib. Bundan əlavə, Gürcüstan hökumətinin
dəqiq göstərişləri və beynəlxalq tənzimləyicilər tərəfindən tətbiq
edilən məhdudiyyətlər olmadığı şəraitdə "APM Terminals Poti"
çoxməqsədli limanının Gürcüstan və regionun sanksiyaya məruz
qalmayan yükləri qəbul etməkdən əsassız olaraq imtina etmək hüququ
yoxdur".
Ermənistanın Baş naziri Nikol Paşinyan sentyabrda bildirib ki,
Ermənistanın təhlükəsizlik baxımından yalnız bir ölkədən, yəni
Rusiyadan asılı olması “strateji səhvdir”.
8 noyabr tarixində mətbuat Ermənistanın Hindistanla 41,5 milyon
dollar dəyərində ZADS (Zen Anti-Drone System) anti-dron sistemini
almaq üçün müqavilə imzaladığını bildirib.
2022-ci ilin sentyabrında Hindistanın “The Economic Times” nəşri
Yerevanın Dehlidən “Pinaka” reaktiv yaylım atəşi sistemi də daxil
olmaqla 244,7 milyon dollar dəyərində silah-sursat alacağını
bildirib.