Cənubi Koreya hökuməti 2027-ci ilə qədər ölkədə it ətinin
istehlakını tamamilə dayandırmaq üçün 2023-cü ilin sonuna qədər
xüsusi qanunun tətbiqinə razılıq verib.
Məlumatı “The Korea Herald” yayıb.
Bildirilib ki, Cənubi Koreya Prezident Administrasiyası, hakim
partiya nümayəndələrinin növbədənkənar birgə iclasında itlərin
yetişdirilməsi, kəsilməsi, eləcə də it ətinin ixracı və satışını
qadağan edən qanun layihəsinin təqdim olunması
ilə bağlı razılığa
gəliblər.
Qanun layihəsi ölkə parlamentində səsverməyə çıxarılacaq. Hökumət
bu istiqamətdə fəaliyyət göstərən müəssisələrə maliyyə dəstəyi
verməyi planlaşdırır.
Məlumata görə, 2022-ci ildə Cənubi Koreyada qida üçün itlər
yetişdirən 3500-ə yaxın təsərrüfat olub. Bu təsərrüfatlar ölkə üzrə
təxminən 3000 restoranı it əti ilə təmin edir. Ötən il keçirilən
sosioloji rəy sorğusuna görə, 18 və daha yuxarı yaşda olan
insanların 64 faizi it ətinin yeyilməsinə mənfi münasibət
bəsləyib.