Cümə axşamı günü Azərbaycan Prezidenti İlham Əliyev ölkədə növbədənkənar prezident seçkisinin keçirilməsi üçün sərəncam imzalayıb, president.az saytı yazıb.

Prezidentin sərəncamına əsasən növbədənkənar prezident seçkisi 2024-cü il fevralın 7-nə təyin olunub.

Növbədənkənar seçkilərin keçirilmə səbəbləri ilə bağlı hələlik rəsmi açıqlama verilməyib.

Azərbaycanda sonuncu dəfə prezident seçkisi 2018-ci ildə baş tutub.

Sonuncu prezident seçkisi də növbədənkənar, planlaşdırılandan yarım il əvvəl keçirilib.

2016-cı ildə keçirilən referendum seçkiləri nəticəsində Konstitusiyada dəyişilik edilərək prezidentlik müddəti 5 ildən 7 ildək uzadılıb.

Konstitusiyaya görə Prezident İlham Əliyevin prezidentlik səlahiyyəti 2025-ci ildə başa çatır.