Üç il əvvəl Rusiya ordusu Ukraynaya genişmiqyaslı hücuma başladı.
Müharibə on minlərlə ukraynalının həyatına son qoydu və milyonlarla insanı qaçqın vəziyyətinə saldı.

Üç il ərzində BMT-nin sənədləşdirdiyi rəsmi məlumatlara görə, Ukraynada 12 600-dən çox mülki şəxs həlak olub və 29 000-dən çox insan yaralanıb. Əslində, qurbanların sayı xeyli çoxdur, çünki Rusiya tərəfindən işğal olunmuş ərazilərdə ölənlər və yaralananlar haqqında dəqiq məlumatlar mövcud deyil.

Ukrayna hakimiyyətinin məlumatına görə, üç il ərzində Rusiya ilə müharibədə 46 000-dən çox Ukrayna hərbçisi həlak olub. Bu barədə 2025-ci ilin fevralında Prezident Volodimir Zelenski NBC News-a verdiyi müsahibədə bildirib.

Rusiya rəsmi olaraq sonuncu dəfə 2022-ci ilin sentyabrında Ukraynada 6 minə yaxın rus hərbçisinin öldüyünü açıqlayıb. Lakin üç il ərzində BBC-nin Rus xidməti və "Mediazona" nəşri açıq mənbələrə əsaslanaraq Ukraynada 95 026 rus hərbçisinin həlak olduğunu müəyyən edib. Hərbi ekspertlər hesab edirlər ki, media tərəfindən nekroloqların, qəbiristanlıqların və hərbi memorialların araşdırılması əsasında müəyyən edilən bu rəqəm, ümumi itkilərin 45-65%-ni təşkil edə bilər.

Ukrayna Sosial Siyasət Nazirliyinin 2024-cü ilin dekabr ayı üçün hesabatına görə, müharibənin başlanmasından sonra ölkə daxilində məcburi köçkün kimi qeydiyyatdan keçən 3,6 milyon vətəndaş var.

BMT-nin məlumatına görə, 2025-ci ilin yanvar ayına qədər dünya üzrə 6,9 milyona yaxın ukraynalı qaçqın kimi qeydiyyata alınıb, onlardan 6,3 milyonu Avropa ölkələrində yaşayır. Müharibədən əvvəl Ukraynanın əhalisi 40 milyondan çox idi.

BMT-nin hesabatına əsasən, Ukraynada yaşayış evlərinin 10%-dən çoxu zədələnib və ya tamamilə dağıdılıb, bu da ən azı 2 milyon insanın adekvat yaşayış yerindən məhrum olması deməkdir. Müharibə zamanı 3600-dən çox məktəb və universitet zədələnib və ya dağıdılıb. BMT-nin məlumatına görə, hazırda Ukraynada 12,7 milyon insanın humanitar yardıma ehtiyacı var.

Rusiyanın genişmiqyaslı işğalından sonra Ukraynanın iqtisadi itkilərini sənədləşdirən Kiyev İqtisadiyyat Məktəbinin məlumatına görə, 2024-cü ilin sonuna qədər ölkənin infrastrukturuna dəyən ziyan 170 milyard dolları ötüb. Ən çox zərər görən sektorlar isə yaşayış fondu, nəqliyyat infrastrukturu və enerji sistemi olub.

• Rusiya ordusu Ukraynanın ərazisinə 2022-ci il fevralın 24-də daxil olub.
• Prezident Vladimir Putin "xüsusi hərbi əməliyyatın" məqsədi kimi Ukraynanın "demilitarizasiyası və denasifikasiyasını" elan edib.
• Ukraynaya Rusiya ordusunun genişmiqyaslı müdaxiləsindən əvvəl Putin Ukraynanın iki separatçı bölgəsi – Donetsk və Luqanskın qondarma "xalq respublikaları"nın "müstəqilliyini" tanıyıb. Bundan əvvəl isə Rusiya Ukraynanın NATO-ya üzv olmamasını tələb edirdi.
• 2022-ci il sentyabrın 30-da Rusiya Ukraynanın Xerson, Zaporojye, Donetsk və Luqansk vilayətlərini öz ərazisi elan edib, lakin bu bölgələrin heç birinə tam nəzarət edə bilmir.
• 2014-cü ildən bəri Rusiya Ukraynanın Krım yarımadasını və Sevastopol şəhərini ilhaq edib.
• Putinin hakimiyyəti müharibənin bitməsi üçün Ukraynanın artıq işğal olunmuş ərazilərini Rusiya torpağı kimi tanımasını və ölkənin NATO-ya qoşulmaqdan imtina etməsini tələb edir.
• Ukrayna isə öz ərazilərindən imtina etməyəcəyini və təhlükəsizliyinin beynəlxalq zəmanətlə təmin olunmasını tələb edir.