10 sentyabr tarixində Bakı şəhərində Zabit Səmədovun vida döyüşü
keçirilib. 65 kq çəki dərəcəsində Gürcüstanı təmsil edən
Qardabanili idmançı Emil Xəlilov Türkiyəli rəqibi Nuri Kaçarı
nokauta salaraq qələbə qazanıb. Hər iki idmançıya medal verilib.
Xəlilov Gürcüstanın bayrağı ilə arenada dövrə vurub.
Əsas döyüşdən öncə Azərbaycanın daha bir neçə idmançısı öz
qüvvəsini sınayıb. Belə ki, Azərbaycan kikboksçusu Məhəbbət
Hümbətov “Qladiator” ləqəbli İhab Lahlunu (Mərakeş) sınağa çəkib.
70 kq-da çıxış edən Azərbaycan idmançısı rəqibini məğlub edib.
Azərbaycanın və “Qəbələ” İdman Klubunun kikboksçusu Alim Nəbiyev də
növbəti qələbəsini qazanıb. 77 kq çəki dərəcəsində mübarizə aparan
28 yaşlı idmançı rumıniyalı Andrey Ostrovyanu ilə qarşılaşıb. Alim
bu döyüşdə rəqibini məğlub edib. Nəbiyev qarşılaşmanı vaxtından
əvvəl başa vurmağı bacarıb. O, sonuncu raundda rəqibini nokauta
salıb. Bu qələbə Alimin peşəkar karyerasında 53-cü olub.
Ruslan Nağıyev (72,5 kq) Dmitri Filonçiki məğlub edib. Bu çəkidə
keçirilən digər döyüşdə Andrey Kedveş (Xorvatiya) Besmir Helşanidən
(Albaniya) üstün olub. Daha sonra 72,5 kq çəki dərəcəsində
yarımfinalın qalibləri bir-birləri ilə döyüşüb. Ruslan Nağıyev 3-cü
raundda xorvatiyalı Andrey Kedveşə qarşı döyüşə bilməyəcəyini
bildirib. Beləliklə, Andrey Kedveş dekabrda “Mix Fight
Championship” kəməri uğrunda döyüşəcək.
Digər azərbaycanlı kikboksçu Cabbar Mustafayev (67 kq) isə İrakli
Cquşiaya (Gürcüstan) uduzub.
Bundan başqa, ən ağır çəkili idmançıların döyüşündə (+100 kq)
türkiyəli Buğra Ərdoğan Kiril Bulerdən (Almaniya) üstün olub.
Rusiya təmsilçisi Seyfulla Xambaxadov (72,5 kq) Konqo əsilli
Kristian Bayanı nokauta salıb. Yeganə qadın döyüşündə Niderland
təmsilçisi Nikita Kosterman (65 kq) qalib gəlib. O, da türkiyəli
Kübra Aksoyu məğlub edib.
Nəhayət, gecənin əsas döyüşündə səbəbkar Zabit Səmədov braziliyalı
sabiq UFC döyüşçüsü, “Yekəayaq” ləqəbli Antonio Silva ilə
qarşılaşıb. Azərbaycanlı kikboksçu bu döyüşlə peşəkar karyerasını
başa vurub. “Mauqli” ləqəbli döyüşçü Antonio Silvanı 1-ci raundda
nokauta salmaqla kəmərə sahib olub. Bununla da Zabit Səmədov
karyerasını bitirib.
O, söz alaraq təşkilatçılara təşəkkürünü bildirib:
“Güc
birlikdədir. Azərbaycanda – Vətəndə karyeramın son döyüşünü
keçirdiyim üçün şadam. 24 ildir ki, döyüşürəm. Artıq karyeramı
bitirirəm”.
Qeyd edək ki, 38 yaşlı Zabit Səmədov 24 illik karyerası ərzində 113
döyüş keçirib. O, bunlardan 103-də qalib gəlib. Bu qələbələrdən
38-i nokautla qeydə alınıb.
Onu da əlavə edək ki, Almaniyanın “Mix Fight Championship”
təşkilatının təşkil etdiyi döyüş gecəsi Bakı şəhərində yerləşən
Milli Gimnastika Arenasında keçirilib.