Gürcüstanın Energetikanın İnkişafı Fondu ölkədə külək elektrik
stansiyaları (KES) tikməyi planlaşdırır. Bununla bağlı dünyanın
qabaqcıl ölkələrinin, eləcə də Azərbaycanın təcrübəsi öyrənilir.
Fonddan bildirilib ki, bütün dünyada alternativ enerji mənbələrinə
keçidlə bağlı layihələr hazırlanır. Gürcüstanda da elektrik
enerjisinə olan ehtiyacın ödənilməsi üçün müxtəlif yollar
araşdırılır, o cümlədən, külək enerjisindən istifadənin yolları
öyrənilir.
“Ölkədə günəş və külək enerjisinə inteqrasiyanın daha
önəmli olacağı düşünülür”, - deyə fonddan
bildirilib.
Mütəxəssislərin fikrincə, elektrik enerjisinə olan ehtiyac hər il
bir neçə dəfə artır. Bu isə onu deməyə əsas verir ki, Gürcüstan
2030-cu ildə ciddi enerji böhranı ilə üzləşəcək.
Fondun məlumatına görə, hazırda Zestafoni, Niqoza, Ruisi və ölkənin
mərkəzi yerlərində külək stansiyaları qurmaq üçün layihələr
hazırlanıb. Onların ümumi gücü 200 meqavat/saatdan çox olacaq.
Fondun rəhbəri Qeorqi Çikovani bildirib ki, hazırda bu layihələrin
texniki-iqtisadi əsasları hazırlanır. Gələn ilin əvvəllərində isə
layihələrin icrasına başlanıla bilər.
Onun sözlərinə görə, 2030-cu ildə Gürcüstanın enerjiyə olan
tələbatının 20 faizi külək, 5 faizi isə günəş enerjisi hesabına
ödəniləcək. 2010-cu ildən sonra fondun köməyi ilə ölkənin enerji
sisteminə 140 meqavat/saat əlavə olunub. Ümumilikdə ölkənin enerji
sisteminin növbəti 3 ildə təkmilləşdirilməsinə 800 milyon lari
investisiya yatırılacaq.
Gürcüstan Elektrik Enerjisi Bazarı Operatorunun məlumatına görə,
2020-ci ildə ölkə 12,4 milyard/saat elektrik enerjisi istehsal
edib. Daha 1,6 milyard kilovat/saat elektrik enerjisini isə qonşu
ölkələrdən alıb.
Mənbə: azertac.az