Yanvarın 25-də Marneuli və Qızılhacılıda yeni su təchizatı şəbəkəsi sınaqdan keçirilib. Marneulinin bir neçə küçəsində nöqsanlar aşkarlanıb, buna görə bu gündən bəzi ərazilərə su verilmir.

“Gürcüstan Birləşmiş Su Təchizatı Şirkətinin” Kvemo Kartli Xidmət Mərkəzinin rəhbəri Kaxa Çoqoladzenin bizimlə söhbəti zamanı qeyd etdiyinə görə, içməli suyun sınaqdan keçirildiyi gün çatışmazlıqlar aşkar edilsə də, bütün ərazilərə normal təzyiqlə su uğurla çatdırılıb. Ancaq növbəti gün nöqsanlar aşkarlanıb. Əsasən köhnə sistemin mövcud olduğu və ya yeni, köhnə şəbəkə arasında əlaqə nöqtəsinin olduğu ərazilərdə problem olub. Çoqoladze deyir ki, hazırkı vəziyyət onlar üçün gözlənilməz olmayıb və yəqin ki, həftənin sonuna kimi sökmək işlərini başa çatdıracaqlar.

“Köhnə şəbəkənin bəzi hissələri qaldığından, tamamlanması lazım olan bəzi şeylər var. Hazırda bu çatışmazlıqlar aradan qaldırılır. Əhali suyu yeni sistemlə alır, sadəcə olaraq bəzi yerləri bağlamalıyıq. Hazırda ən çox zərər çəkən Rustavelidir. Çolokaşvili küçəsində nöqsanlar var, binada yaşayış şəbəkəsi zədələnib və bütün küçə bağlanıb. Sulxan-Saba, 26 May küçəsində, bildiyimə görə, Kobuleti küçəsində də çatışmazlıq var. Ümumilikdə, Marneulidə görülən işlər bizə Marneulini 24 saatlıq su təchizatı sisteminə keçirməyə imkan verir. Təbii ki, bəzi çatışmazlıqlar olacaq, amma biz bunun üzərində işləyirik və onları aradan qaldırmaq üçün bu həftəlik vaxt lazım olacaq”.

Kaxa Çoqoladze qeyd edib ki, onların içməli suyun keyfiyyəti ilə bağlı heç bir problemi yoxdur. Marneuli suyunun laborator müayinəsi müsbət nəticə verib.

Qeyd edək ki, Marneulidə su təchizatı sisteminin dəyişdirilməsi ilə bağlı müzakirələr hələ 2018-ci ildə başlayıb. Dörd il əvvəl Marneuli Bələdiyyəsinin 35 200-ə yaxın sakininə 24 saat içməli su veriləcəyi vəd edilib. Layihənin Marneuli şəhəri və kəndlərində icrasına 2019-cu ildə başlanılıb. Yollar qazılıb, borular qırılıb, infrastruktura ziyan dəyib, yollar bərbad vəziyyətdə olduğundan ictimai nəqliyyata və yerli avtomobillərə ziyan dəyib.

Layihənin “Akelik Group” şirkəti tərəfindən 2021-ci ilin mart ayına qədər tamamlanmalı idi, lakin şirkət öz öhdəliyini yerinə yetirə bilmədi. Bu səbəbdən 55 940 022 dollarlıq layihə dayandırılıb. “Akelik Group” işçilərinin maaşını ödəyə bilmədiyi üçün şirkətə qarşı məhkəmə prosesi başlayıb və nəticədə şirkət 9 işçinin maaşını ödəməyə məcbur olub.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---