Qardabanidə 15 yaşlı qızı qaçıran 4 nəfər həbs olunub
10:53 / 12.01.2021
Qardabaninin kəndlərindən birində yetkinlik yaşına çatmamış qızı
qanunsuz azadlıqdan məhrum etdiyi üçün 4 nəfər həbs olunub.
Bu barədə məlumatı Daxili İşlər Nazirliyi yayıb.
Qurumun verdiyi məlumata görə, araşdırma zamanı E.B.-nin anasının
və 2 qohum qadının köməyi ilə yetkinlik yaşına çatmamış qızı –
2005-ci il təvəllüdlü S.B.-ni evlənmək üçün qaçırdığı ortaya
çıxıb.
Törədilmiş cinayətə görə, 7 ildən 10 ilədək həbs cəzası nəzərdə
tutulur.
Daxili İşlər Nazirliyinin Kvemo Kartli Polis Şöbəsinin Qardabani
Rayon Bölməsinin əməkdaşları həyata keçirilmiş əməliyyat-istintaq
tədbirləri nəticəsində yetkinlik yaşına çatmamış bir qızın qanunsuz
olaraq azadlıqdan məhrum edilməsi faktı ilə bağlı 4 nəfər: 1997-ci
il təvəllüdlü E.B., 1978-ci il təvəllüdlü Ç.A, 1974-cü il
təvəllüdlü B.B. və 1995-ci il təvəllüdlü A.B. həbs olunub.
"Qrup tərəfindən əvvəlcədən razılaşma yolu ilə yetkinlik yaşına
çatmamış şəxsin qanunsuz olaraq azadlıqdan məhrum edilməsi faktı
ilə bağlı Gürcüstanın Cinayət Məcəlləsinin 143-cü maddəsinin 3-cü
hissəsinin "a" və "b" bəndləri ilə istintaq
aparılır", – deyə məlumatda bildirilib.