„არჩევნები გადამწყვეტი იქნება, რათა მოვიშოროთ ქართული კოშმარი“ – განაცხადა საქართველოს პრეზიდენტმა, სალომე ზურაბიშვილმა France Info-სთან ინტერვიუში.

„გადამწყვეტი იქნება იმისათვის, რომ თავიდან მოვიშოროთ არა „ოცნება“, არამედ ქართული კოშმარი, რადგან საქართველოსთვის ყველაფერი, რაც არ არის მისი გზა ევროპისკენ, თავისუფლებისა და დამოუკიდებლობის კონსოლიდაციისკენ, კოშმარია“, – განაცხადა პრეზიდენტმა.

მანამდე ზურაბიშვილს ინტერვიუ ჰქონდა CNN-თან და კიდევ ერთხელ გააკრიტიკა რუსული კანონი და აღნიშნა, რომ ეს არ არის ქართველი ხალხის ნება. მისი თქმით, საქართველო ახლა უფრო ახლოსაა ევროინტეგრაციის გზაზე, რის შეჩერებასაც რუსეთი თავისი ჰიბრიდული სტრატეგიით ცდილობს, რასაც დღეს ხელისუფლება ეხმარება.

მან, ასევე, ისაუბრა ბოლო სამი დღის განმავლობაში მიმდინარე მშვიდობიან აქციებზე და თქვა, რომ მისი მიზანი, საბოლოო ჯამში, მიმართული უნდა იყოს არჩევნებისკენ.

---

„ქართული ოცნება“ კიდე ერთხელ აპირებს რუსული კანონის მიღებას, რომელიც 2023 წლის მარტში მასობრივი პროტესტის შედეგად უკან გაიწვიეს. „ქართულმა ოცნებამ“ გასულ წელს დადო პირობა, რომ რუსულ კანონს აღარ დაუბრუნდებოდნენ, მაგრამ პირობა დაარღვია. ქართულმა ოცნებამ კანონპროექტის პირვანდელი ფორმულირებიდან მხოლოდ სიტყვა "აგენტი" ამოიღო და ის უცხოური ძალის ინტერესების გამტარებლით შეცვალა.
კანონის მიხედვით, ყველა არასამთავრობო და მედიაორგანიზაცია, რომლის შემოსავლების 20%-ზე მეტი უცხოეთიდან არის მიღებული უცხოური ძალია ინტერესების გამტარებლად ჩაითვლება. სახელმწიფო არ გამოიკვლევს თუ რას საქმიანობენ და რა მიზნებს ემსახურებიან ეს ორგანიზაციები და მათ ყველას უცხოური ძალის ინტერესის გამტარებლად შერაცხავს.
კანონი მიმართულია ევროპასა და ამერიკისაგან შემოსულ დაფინანსებებზე და არა მტრულად განწყობილი ქვეყნებიდან შემოსულ დაფინანსებებზე, როგორც ეს ცივილიზებულ ქვეყნებშია.
კანონის ინიცირების გამო შეშფოთება გამოთქვეს ევროკავშირის წევრმა და საქართველოს მეგობარი ქვეყნების ლიდერებმა, რუსეთის პრეზიდენტის პრესმდივანმა კი „ქართული ოცნების“ კანონი მოიწონა.