საბავშვო ლიტერატურული კლუბის დამფუძნებელი, მასწავლებელი მიშიკო მუმლაძე დღეს, 22 აპრილს ქუთაისში დააკავეს.

კოლეგები მას 4 საათის განმავლობაში ეძებდნენ.

დაკავებამდე მიშიკო მუმლაძემ ფეისბუქზე დაწერა, რომ ქუთაისში, მესხიშვილის თეატრში მივიდა, სადაც ჰომოფობიური კანონის დასამტკიცებლად საკონსტიტუციო ცვლილებების საყოველთაო-სახალხო განხილვა იმართებოდა.

„ქართულ ოცნებას აქვს საყოველთაო-სახალხო შეხვედრა ხალხთან მესხიშვილის თეატრში და არ მიშვებენ შიგნით. არადა, არასრულწლოვნებს და ოჯახის ღირებულებებს ეხება. ოჯახიც მყავს და 300 მოსწავლე კიდე.

მამუკა მდინარაძე, უთხარი შემომიშვან“. – დაწერა მან.

4 საათის შემდეგ შინაგან საქმეთა სამინისტრომ განაცხადა, რომ მუმლაძე ადმინისტრაციულ სამართალდარღვევათა კოდექსის 166-ე – ხულიგნობის მუხლით დააკავეს. ის ახლა პოლიციის განყოფილებაშია და მალე სასამართლოში გადაიყვანენ.

საქმის კურსშია სახალხო დამცველი.

---

„ქართული ოცნება“ კიდე ერთხელ აპირებს რუსული კანონის მიღებას, რომელიც 2023 წლის მარტში მასობრივი პროტესტის შედეგად უკან გაიწვიეს. „ქართულმა ოცნებამ“ გასულ წელს დადო პირობა, რომ რუსულ კანონს აღარ დაუბრუნდებოდნენ, მაგრამ პირობა დაარღვია. ქართულმა ოცნებამ კანონპროექტის პირვანდელი ფორმულირებიდან მხოლოდ სიტყვა "აგენტი" ამოიღო და ის უცხოური ძალის ინტერესების გამტარებლით შეცვალა.
კანონის მიხედვით, ყველა არასამთავრობო და მედიაორგანიზაცია, რომლის შემოსავლების 20%-ზე მეტი უცხოეთიდან არის მიღებული უცხოური ძალია ინტერესების გამტარებლად ჩაითვლება. სახელმწიფო არ გამოიკვლევს თუ რას საქმიანობენ და რა მიზნებს ემსახურებიან ეს ორგანიზაციები და მათ ყველას უცხოური ძალის ინტერესის გამტარებლად შერაცხავს.
კანონი მიმართულია ევროპასა და ამერიკისაგან შემოსულ დაფინანსებებზე და არა მტრულად განწყობილი ქვეყნებიდან შემოსულ დაფინანსებებზე, როგორც ეს ცივილიზებულ ქვეყნებშია.
კანონის ინიცირების გამო შეშფოთება გამოთქვეს ევროკავშირის წევრმა და საქართველოს მეგობარი ქვეყნების ლიდერებმა, რუსეთის პრეზიდენტის პრესმდივანმა კი „ქართული ოცნების“ კანონი მოიწონა.