Tbilisi Dövlət Azərbaycan dram teatrının aktyorları və direktor
müavini işdən uzaqlaşdırılıblar.
Aktyorların və eləcə də direktor müavinin hansı səbəblə işdən azad
olunduğunu öyrənmək üçün direktor müavini Namiq Hacıyev ilə əlaqə
saxladıq. O, “Marneuli” radiosu ilə söhbəti zamanı bildirdi ki, 25
mart tarixində onlara məktub gəlib ki, siz 11 mart tarixindən işdən
azad olunubsuz və işdən azad olunmalarının əsas səbəbi 2019-cu
ilin yanvar ayında dram teatrına təyin olunmuş bədii
rəhbər Turqay Vəlizadədir. Onun sözlərinə görə, teatr bərpa
olunduğu gündən T.Vəlizadə ilə birlikdə çalışıblar. Namiq Hacıyev
iddia edir ki, nazirlik xüsusi olaraq Vəlizadəni teatrı çökdürmək
məqsədi ilə direktor vəzifəsinə təyin edib.
“Elə ilk addımından Turqay bəy özünü büruzə verdi və tanıtdı.
Təqdimatlar hər zaman teatrın özündə olur. Lakin bu səfər təqdimat
nazirlikdə baş tutdu və heç kim getməmişdi. Biz bilirdik ki, bunun
bu şəkildə təqdim olunması, təyin olunması axırda hansı nəticəyə
gəlib çıxacaq”, – Namiq Hacıyev dedi.
O, bildirdi ki, Gürcüstanda fəaliyyət göstərən və əsası 2018-ci
ildə qoyulan “Era” teatrının tamaşalarının məşqləri hər zaman
Tbilisi Dövlət Azərbaycan dram teatrında olub və teatrın keçmiş
rəhbəri də onlara dəstək olub. Namiq Hacıyev deyir ki, əvvəllər
teatrda tamaşalar zamanı ən aktiv şəkildə iştirak edənlər “Era”nın
gənc aktyorları olublar. Lakin Vəlizadənin direktor vəzifəsinə
təyin olunmasından sonra gənclər teatrdan uzaqlaşdırılıblar.
“Özü gəldi, özünü yeni direktor elan etdi. Azərbaycanlı
müsahibimiz var idi, onu işdən uzaqlaşdırdı və özünün gürcü mühasib
tanışını işlə təmin etdi. Bunların hamısı yanvar və mart ayında baş
verib. Aprel ayında işçilərə premiya verildi və 1 aydır işləyən
yeni müsahibə premiya verdi və illərlə işləyən işçilərin çoxuna
premiya vermədi və ayrı-seçkilik etdi. Dəfələrlə söz verdi ki,
işçilərə məzuniyyətə çıxmazdan öncə premiya veriləcək, amma belə
olmadı”, – direktor müavini Namiq Hacıyev dedi.
Namiq Hacıyevin sözlərinə görə, o, köhnə tamaşaları bərpa etməyə
başladı.
"Təyin olunandan köhnə tamaşaları bərpa etməyə başladı
(Çünki vaxtilə bu tamaşaları Qoça Kapanadze bunun adı ilə
qurmuşdu). Aktyorlar buna etiraz etdi, çünki artıq bu tamaşalar öz
aktuallığını itirmişdi. Ancaq bunu yeni tamaşalara quruluş vermək
bacarığı olmadığında aktyorlara "mən bu tamaşaları bərpa edirəm, nə
xoşunuza gəlmirsə, nazirliyə şikayəy edin" cavabını verdi.
Ümumiyyətlə hər etirazımıza onun cavabı belə idi: "mən belə
istəyirəm, xoşunuza gəlmirsə, nazirliyə etirazınızı
bildirin", - Namiq Hacıyev dedi.
O, qeyd etdi ki, 2018-cu ildə SOCAR şirkəti teatra maddi dəstək
olaraq 15000 dollar məbləğində pul ayırıb. Bu məbləğ keçmiş bədii
rəhbər tərəfindən hər dəfə premiya olaraq işçilərə paylanılıb.
Hacıyev deyir ki, Vəlizadə rəhbər təyin olunduğu gündən bütün
bunlar təkrar olunmayıb və o, istədiyi insanlara premiya verib
istəmədiklərinə isə verməyib. Bununla bağlı ona zəng edildikdə isə
telefona cavab verməyib.
Namiq Hacıyev deyir ki, teatr 7 aydır ki, cəmi 2 nəfər üzərində
işləyir və bundan artıq aktyor aktrisa yoxdur. Hacıyev deyir ki,
məsələ ilə bağlı məhkəməyə şikayətlərini təqdim ediblər. Yaxın
günlərdə isə ictimaiyyətə açıq məktub şəkilində müraciət
edəcəklər.
Namiq Hacıyev teatrın xalqın olduğunu dedi və bildirdi ki, məsələ
ilə bağlı hər kəs maraqlanmalıdır.
Tbilisi Dövlət Azərbaycan dram tetrının rəhbəri Turqay Vəlizdədən
direktor müavininin və aktyorların işdən azad olunmaları ilə bağlı
məlumat aldığımız zaman yenidən paylaşım edəcəyik.
İşdən azad olunanlar – Namiq Musayev, Vüqar Maşov, Anar Rafiqoğlu,
Azər Musaoğlu, Binəli İslamoğlu, Fazil Bayramov, Şeyla Cəfərova,
Namiq Hacıyev, Qaxa Lazarişvili və daha iki nəfər.