Gürcüstan mədəniyyəti, ənənələri, rəngarənglik – bir neçə həftə əvvəl Marneulidən Almaniyaya getmiş kuklalar bu barədə danışıblar. Kukla düzəldən-nağılbaz Armen Hovanesyan Avropada ilk dəfə kukla tamaşası göstərib. O, bildirir ki, onun yaratdığı kuklalar tez-tez azadlıq və insan hüquqlarına aid olan mühüm dəyərlərdən danışırlar.

“İnsan azadlığı mənim üçün ən dəyərlidir. İstəyirəm ki, bunu öz kuklalarım vasitəsilə ictimaiyyətə çatdırım.

Xüsusuilə də yeni nəsilə göstərmək istəyirəm. İnsan öz baxışlarında azad olmalıdır və stereotiplərlə yaşamamalıdır. Şəxsən mənim üçün Avropa azadlıq, insan hüquqlarının müdafiəsi, keyfiyyətli təhsil deməkdir. Avropa yalnız gözəl binalar və mədəniyyət deyil, həm də yaxşı dəyərlərdir. Nədənsə bizim cəmiyyətdə bu günə qədər Avropanı yaxşı qəbul etməyən adamlar da var. İstəyirəm yalnız biz Avropaya getməyək, həm də Avropa öz dəyərləri, keyfiyyətli təhsili ilə bizə gəlsin”, – Armen Hovanesyan bildirib.

Kuklaçı üçün xarici ölkədə tamaşa qoymaq asan olmayıb. Əsas məqsəd kiçik Gürcüstanı Almaniyaya aparmaq idi. O, düşünür ki, bu alınıb və tamaşaçının müsbət emosiyalarını da qazanıb.

“Avropaya ilk dəfə indi getdim. Berlində və ətraf şəhərlərdə oldum. Bu mənim kuklalarımla birlikdə ilk səfərim idi. Kifayət qədər çətin oldu. Tək idim, tək hər şeyi etmək çox çətindir. Həm də həyəcanlı idim, almanların mənim tamaşamı bəyənib bəyənməyəcəyini bilmirdim. Onlar birbaşa sözlərini deyirlər. Amma mənim kuklalarımı və tamaşamı çox bəyəndilər. Kiçik Tbilisini, kiçik Gürcüstanı və erməni mədəniyyətini almanlara qədər apardım. Başqa ölkələrdə də tamaşalar nümayiş etdirmək istəyirəm”, – Armen Hovanesyan bildirib.

Marneulili Armen Hovanesyan Şaumyan kəndində yaşayır. Evində nağıllar aləmi yaradıb. Uşaqlıqdan kuklalar üzərində işləməyə başlayıb. Dizayn, kukla xarakterləri və ona sözlərini insanlara çatdırmaqda kömək edəcək qəhrəmanlarının bütün detallarını özü yaradır. Kənd-kənd gəzmək və kukla tamaşaları nümayiş etdirmək ictimaiyyətə Armeni tez zamanda tanıtdırıb. Sənətkar Marneuli Mədəniyyət Evində işləyir və bələdiyyədə bir çox tamaşalar nümayiş etdirir. Niderlandın keçmiş səfiri Mayk Van Koldam da Armen Hovanesyanı belə tanıyıb, ona yardım təklif edib və evində kuklalar üçün studiya yaratmaqda ona maliyyə dəstəyi göstərib.

“Mənim evimdə Avropanın müxtəlif səfirləri olub. Öz əməyim və gücümlə region üçün nə bacarıramsa edirəm. Mənim etdiklərim Gürcüstan mədəniyyətinin bir hissəsidir və ona qədər heç bir dəstəyim yox idi. Mayk Van Koldam gəldi, evimi, kuklaları çox bəyəndi. Gördü ki, kuklalar mənim yataq otağımda yaşayırlar və əhali tamanı izləmək üçün buraya gəlir. O, Marneulili uşaqlar üçün belə bir layihə həyata keçirməyi düşündü. Evdə kiçik studiya yaratmaq üçün maliyyə ayrıldı. Uşaqlar buraya gələcək və tamaşaları, kuklaları izləyəcəkdilər. İndi təmir prosesi gedir, düşünürəm iki aya bitirəcəyik. Səfirə həqiqətən də minnətdaram. Bu mənim üçün mühüm şeydir. Əlbəttə, bütün bunlara mən də öz vəsaitimi əlavə etdim. Ancaq mənim ayrıca studiyamın olması üçün onun motivasiyası böyük səbəb idi”.

Armen Hovanesyan kuklalarla öz sözünü böyük auditoriyaya çatdırmağı və öz yaradıcılığını yalnız Marneulidə deyil, Avropanın başqa ölkələrində də nümayiş etdirməyi düşünür.