Marneulili müğənni Şaban Məmmədov Çexiyanın paytaxtı Praqada
keçirilən “Praqa Milad Ulduzları 2023” müsabiqəsində iştirak edib.
O, 16 dekabr tarixində baş tutan XXXIX Beynəlxalq Xalq Rəqsləri və
Musiqisi Müsabiqə-Festivalında “Gran-Pri” mükafatına layiq
görülüb.
Gənc müğəninin “Marneuli” radiosuna verdiyi məlumata görə, o, bu
yarışa “Marneuli Mədəniyət Evi”nin dəstəyi ilə qatılıb.
“Buna görə ilk növbədə Marneuli mədəniyət evinin
rəhbəri Nato xanım Şavişviliyə öz dərin təşəkkürümü bildirirəm.
Yarışmada iki mahnı ilə çıxış etdim və jüri heyətinin qərarı ilə
pop və milli mahnı nominasyasında ən böyük mükafata - “Gran-Pri”-yə
layiq görüldüm. Gürcüstanın adını yüksəklərə qaldırmaq mənim üçün
böyük bir şərəfdir. Mənim üçün hər bir yarışma böyük bir
təcrübədir. Çexiyada keçirilən yarışma isə mənə böyük bir təcrübə
qazandırdı. Həmçinin də gözəl insanlar qazandım”, –
Şaban Məmmədov dedi.
Çexiyada keçirilən “Praqa Milad Ulduzları 2023” müsabiqəsində
Gürcüstanla yanaşı Çexiya, Almaniya, Rumıniya, Ukrayna və
İndoneziyadan olan müğənnilər də iştirak ediblər.
Qeyd edək ki, “Marneuli Mədəniyyət Evi”nin solisti olan Şaban
Məmmədov bu günə qədər xaricdə keçirilən bir sıra müsabiqələrdə
Gürcüstanı təmsil edib və qalibiyyətlər əldə edib.