Marneuli bazarının yaxınlığında, Marneuli Bələdiyyəs ərazisindən keçən Algeti çayının sahili çirklənib. Çay kənarında plastik, sellofan torbalar, şüşə, plastik butulkalar, işlənmiş uşaq bezləri, heyvan qalıqları, kimyəvi, bioloji tullantılar, digər məişət, tikinti tullantılarına rast gəlmək olar.


Algeti çayı Tetritskarodan başlayır, sonra Marneuliyə axır və Kosalı kəndi yaxınlığında Kür çayı ilə birləşir.

Algeti çayının sahili aylardır çirklənir və heç kim ərazini təmizləmir. “Marneuli” radiosu çayın təmizlənməsinə kimin cavabdeh olduğunu araşdırdı.


Marneuli meriyasının İctimaiyyətlə Əlaqələr Şöbəsindən bizə dəfələrlə bildirdilər ki, Marneuli meriyası Algeti çayı sahilinin təmizlənməsinə görə məsuliyyət daşımır. Bələdiyyə Məclisi hətta Algeti çayının sahilini təmizləmək üçün hansı qurumun səlahiyyət daşıdığını da bildirməyib.

“Çay sahilinin təmizlənməsi bizim səlahiyyətimizə aid deyil”, – deyə Marneuli meriyasından bizə bildirdilər.

Gürcüstan Meliorasiyasından “Marneuli” radiosuna bildirilib ki, Algeti çayı onların balansında deyil, ona görə də onlar da çayın sahilini təmizləyə bilməyəcəklər.

Gürcüstanın Ətraf Mühitin Mühafizəsi və Kənd Təsərrüfatı Nazirliyi, onun tabeliyində olan Ətraf Mühitə Nəzarət Departamentindən də bizə bildirdilər ki, onlar çay sahilinin təmizlənməsinə cavabdeh deyillər.

Ekoloji Nəzarət Departamenti bizə izah etdi ki, onlar yalnız qanun pozuntularına və ətraf mühitin çirklənməsinə nəzarət edirlər, çirklənmiş əraziləri təmizləməklə məşğul olmurlar. İdarədən bizə onu da bildirdilər ki, Marneulidən axan Algeti çayının sahillərinin təmizlənməsinə görə məsuliyyəti yerli özünüidarə daşıyır. Bu halda məsuliyyət Marneuli meriyasının üzərinə düşür.

Tullantıların İdarə Olunması Məcəlləsinin 8-ci maddəsinə əsasən, həmin ərazi xüsusi mülkiyyətdə olmadığı halda, bələdiyyə ərazisi olduğuna görə məsuliyyət bələdiyyənin üzərinə düşür.

Marneuli meriyası öz vəzifəsini nəzərə almalı, müvafiq vəsait ayırmalı, Algeti çayının çirklənmiş sahillərini təmizləməlidir.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---