4 avqust 2025-ci il

12:03 – 4 yaşlı Amelia və 1 yaş yarımlıq Əli məhkəmə dəhlizində ataları ilə görüşməyi gözləyirlər. Vicdan məhbuslarının ailə üzvləri arasında ora-bura qaçır, oynayır, sonra yenə analarının yanına qayıdırlar.
Əli və Amelia İnsaf Əliyevin övladlarıdır. İnsaf 4 dekabrda aksiyalarda iştirak etdiyinə görə saxlanılıb.

12:20 – Tbilisi Şəhər Məhkəməsinin birinci zalının qapısı açıldı. Vicdan məhbuslarının iclasında iştirak etmək istəyənlər sürətli addımlarla zala tərəf irəliləyirlər. İnsafın həyat yoldaşı yaş yarımlıq Əlini qucağına götürüb, digər əli ilə 4 yaşlı Ameliyanın əlindən tutaraq məhkəmə zalına doğru qaçır.

12:22 – İnsafın ailəsi məhkəmə zalına daxil olur. İnsaf, daha 7 nəfər vicdan məhbusu və hakim Tamar Mçedlişvili artıq zalda əyləşiblər. İnsaf övladları, həyat yoldaşı və atası ilə məhbus oturacağından danışır. Uşaqlarla uzaqdan oynayır, əlini uzadaraq onları qucaqlamağa çalışır. Lakin mandaturlar toxunmağa icazə vermirlər.

İnsaf uşaqlarını 10 dəqiqə görə bilir. Sonra Əli və Amelia məhkəmə zalından çıxarılır.

İnsaf Əliyevin ailəsi məhkəmə iclasları zamanı ictimai çıxışlardan çəkinir. Onun həyat yoldaşı və atası indiki mərhələdə şərh verməkdən imtina edirlər.

İclas başlayır. 8 nəfər vicdan məhbusunun işi üzrə əsas müstəntiq Arsen Xunaşvili dindirilib.

Müstəntiqə İnsaf Əliyevin vəkili Ayhan Həsənli də suallar ünvanlayır. O, soruşur ki, zərərçəkənlərdən hansısa İnsaf Əliyevin ona ziyan vurduğunu qeyd edirmi? Müstəntiqin sözlərinə görə, şahidlər hər hansı müttəhimin onlara ziyan vurmasını istisna etmirlər.

İttiham tərəfinin açıqlamasına görə, İnsaf Əliyev saxlanılanlardan biri və mütəşəkkil zorakılığın təşkilində ittiham olunan Zviad Tsetsxladzenin müraciətini dinləyib və bundan sonra həmin zorakılığa qoşulub.

Həsənli həmçinin soruşur ki, əgər şəxs gürcü dilini bilmirsə, Zviad Tsetsxladzenin videosunu necə başa düşə bilərdi? Müstəntiq cavab verir ki, dil bilmirsə, başa düşə bilməzdi. Amma ola bilsin ki, kimsə tərcümə edib.

Vəkilin sual verdiyi videonu müstəntiq məhkəmə zalında izləyir, sonra müdafiə və ittiham tərəflərinin suallarına cavab verir. Prokurorluq əvvəlcə dəlil kimi səssiz video təqdim edib və iddia edirdi ki, bu görüntülərdə Zviad Tsetsxladze digər müttəhimləri zorakılığa çağırır.

Səssiz video müstəntiq və prokurorluq tərəfindən məhkəməyə təqdim edilib. 4 avqust tarixində keçirilən iclasda müstəntiq artıq səsli videonu gətirib, öz kompüterində qulaqlıqlarla dinləyib və sonra suallara cavab verib.

8 nəfərin işində 3 müttəhim – Zviad Tsetsxladze, Vepxia Kasradze və Vasil Katselaşvili – qrup zorakılığının təşkilində, digər 5 nəfər – Nikoloz Cavaxişvili, Tornike Qoşadze, İrakli Mininoşvili, Qiorqi Qorqadze və İnsaf Əliyev – qrup zorakılığında iştirak etməkdə ittiham olunurlar.

Vəkil Ayhan Həsənli “Marneuli” radiosuna bildirib ki, ittiham tərəfinin təqdim etdiyi heç bir dəlil İnsaf Əliyevin zorakılıq törətdiyini, xüsusilə də qrup zorakılığında iştirak etdiyini təsdiqləmir:

“İnsaf həm müdafiə hüququndan, həm də məhkəmə prosesinin aparıldığı dili bilmədiyi üçün tərcüməçi hüququndan istifadə edir. Buna görə də fiziki olaraq hər hansı ünsiyyət mümkün deyildi. Ümumiyyətlə, İnsaf digər təqsirləndirilən şəxsləri tanımırdı, onlar arasında heç bir əlaqə yox idi. İttiham tərəfinin əsas dəlili sayılan video da İnsafın kimləsə əlaqə saxladığını və ya danışdığını təsdiqləmir. Dövlət dilində danışmadığını nəzərə alsaq, onun kimləsə əlaqə qurması mümkün deyildi. Hətta danışa bilsəydi belə, bu adamları tanımadığı üçün ünsiyyət qura bilməyəcəkdi.”

Avqustun 4-də ittiham tərəfi 8 vicdan məhbusunun işi üzrə dəlillərin tədqiqini başa çatdırıb. İndi müdafiə tərəfi şahidlərini dindirəcək və dəlilləri araşdıracaq.

Həmin gün etnik azərbaycanlı fəallar İnsafa dəstək üçün Tbilisi Şəhər Məhkəməsinin qarşısında toplaşıblar.

Fəallar bildirirlər ki, İnsaf rayondan olduğu üçün gürcü dilini, eləcə də ailəsinin gürcü dilini bilməməsi səbəbindən onun vicdan məhbusu kimi səsi eşidilmir. Onlar məhkəməyə İnsafa dəstək olduqlarını çatdırmaq və onun səsini daha geniş auditoriyaya yaymaq məqsədilə gəldiklərini deyirlər.


Fəallar hesab edirlər ki, İnsaf qanunsuz olaraq saxlanılıb və bu, etnik azlıqların nümayəndələrini qorxutmaq məqsədi daşıyıb. Vəkil Ayhan Həsənli də eyni fikirdədir:

“Noyabrın 28-də baş nazirin çıxışından sonra İnsaf Əliyev də əksər Gürcüstan vətəndaşları kimi mitinqə çıxıb və iştirak edib. O, ölkədə baş verən konstitusiyaya zidd hadisələrə etirazını bildirib. Buna görə də ona qarşı cinayət işi başlanıb.”

İnsaf Əliyev, Vasil Kadzelaşvili, Vepxia Kasradze, Zviad Tsetsxladze, İrakli Miminoşvili, Qiorqi Qorqadze, Nikoloz Cavaxişvili və Tornike Qoşadzenin saxlanması beynəlxalq və yerli təşkilatlar, həmçinin diplomatik korpus nümayəndələri tərəfindən siyasi motivli iş kimi qiymətləndirilir.

“Beynəlxalq Şəffaflıq – Gürcüstan” təşkilatı yazır ki, İnsaf Əliyevin ittihamı milli azlıqlara verilən siqnal ola bilər:

“Müttəhimlərin profilləri bizə güman etməyə əsas verir ki, onların hamısının olmasa da, bir çoxunun həbsi və ittiham olunması ictimaiyyəti qorxutmaq, konkret qruplarda etirazları dayandırmaq məqsədinə xidmət edir. Məsələn, bu şəxslərin həbslərindən əvvəl aksiyalarda əsasən tələbə qrupları diqqət çəkirdi və bu, etirazlara qarşı həmrəylik hissini artırırdı. Lelonun üzvləri – Kasradze və Kadzelaşvilinin həbsi siyasi partiyalara göndərilən mesajdır. İnsaf Əliyevin ittihamı isə milli azlıqlara bir siqnal ola bilər.”

Təşkilata görə, iş siyasi motivlidir və adekvat sübutlar yoxdur. Belə ki:

• İttiham tərəfi İnsaf Əliyevin “qrup zorakılığı”nda iştirakını sübut edəcək kifayət qədər dəlil təqdim etməyib;
• Onun zorakı hərəkətlərini göstərən heç bir video və ya aydın dəlil yoxdur;
• Hakimiyyət tərəfindən etiraz iştirakçılarını qorxutmaq üçün tez-tez istifadə olunan 225-ci maddədən istifadə edilib;
• Cinayət təqibi ictimai fəallara təzyiq vasitəsi kimi tətbiq olunur.

İnsaf və daha 7 vicdan məhbusunun işi FIDH (Beynəlxalq İnsan Haqları Federasiyası), OMCT (İşgəncələrə Qarşı Ümumdünya Təşkilatı), Human Rights House Foundation (HRHF) və digər beynəlxalq təşkilatlar tərəfindən izlənilir və siyasi motivli hesab olunur.

İnsaf 8 aydır ki, istintaq təcridxanasındadır. Onun vəkili Ayhan Həsənlinin sözlərinə görə, hakim vicdan məhbuslarının həbsdə qalması üçün prosesi yaxın bir ay ərzində yekunlaşdırmaq və hökm çıxarmaq istəyir. Gürcüstan qanunlarına görə, məhkəməyəqədər həbs müddəti maksimum 9 aydır.

2024-cü ilin noyabr-dekabr aylarında “Gürcü Arzusu”nun Qərb strukturlarına inteqrasiyasının dayandırılmasına etiraz edən mitinqlərdə iştirak etdiklərinə görə onlarla insan həbs edilib. İttiham tərəfi həmçinin İnsaf Əliyev və digər 7 vicdan məhbusunun işi ilə oxşar olan 11 vicdan məhbusunun işi üzrə şahidlərin dindirilməsini də başa çatdırıb.

Hazırda Gürcüstanda 50-dən çox vicdan məhbusu var.

Jurnalist və media meneceri, “Batumelebi” və “Netgazeti”nin təsisçisi, direktoru Mzia Amağlobeli 2 il müddətinə azadlıqdan məhrum edilib.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Bizi "TikTok"da izləyin.
Bizi "İnstagram"da izləyin.
Bizi "X"da izləyin.
Şahidi olduğunuz hadisələri çəkib bizə göndərin! +995557994415

---