Bir neçə dəqiqə öncə avtomagistralı bağlayan Xeltubani kənd
sakinləri aksiyanı Qori meriyası qarşısında davam etdirəcəklər.
6 iyul tarixində 18 yaşlı Tornike Merabişvili ölmüş vəziyyətdə
tapılmışdı. Hadisə ilə bağlı əvvəlcə Gürcüstan Cinayət Məcəlləsinin
özünü öldürmə həddinə çatdırmanı nəzərdə tutan 115-ci maddəsi ilə
istintaq başlamışdı. Daha sonra isə istintaqın maddəsi dəyişmişdi
və nəqliyyat vasitəsinin hərəkəti təhlükəsizliyi və ya istismarı
qaydasının insan həyatının itirilməsinə səbəb olan pozulmasını
nəzərdə tutan 276-cı maddənin 5-ci hissəsi ilə davam etmişdi.
Dünyasını dəyişmiş gəncin ailəsi hesab edir ki, 18 yaşlı gənci
qətlə yetiriblər və onun bədənində mövcud olan zədələr qəza
nəticəsində olmayıb.
Gürcüstan Daxili İşlər Nazirliyindən “Netgazeti”yə verilən məlumata
görə, işə Gürcüstan Cinayət Məcəlləsinin 117-ci maddəsi də əlavə
olunub ki, bu da sağlamlığa qəsdən ağır xəsarət yetirməni nəzərdə
tutur. Nazirlikdən bildirirlər ki, ilkin müşahidə nəticəsində
mərhumun bədənində nə soyuq silah, nə də odlu silahla yetirilmiş
xəsarət müşahitə olunmurdu. Hal-hazırda isə ekspertizanın rəyini
gözləyirlər.
Merabişvilinin ailəsi istintaq xidmətinə inanmır. Mərhumun ailəsi
hesab edir ki, 18 yaşlı gəncin qatillərini qoruyurlar və baş
prokuror və baş nazirlə görüş tələb edirlər.