3000 larilik cərimələri hara şikayət edə bilərik
Gürcüstan Xalq müdafiəçisi karantin və təcrid qaydaları, həmçinin
fövqəladə vəziyyət rejiminin pozulmasına görə yazılan cərimələrlə
bağlı məlumat yayımlayıb.
“Fövqəladə vəziyyət elan olunduqdan sonra təcrid və/və ya karantin
qaydalarının pozulmasına görə yüzlərlə vətəndaş cərimə olunub. Bəs
bu cərimələri şikayət etmək mümkündürmü? Hansı müddət ərzində və
hara şikayət edə bilərik? Xalq müdafiəçisi vətəndaşlar tərəfindən
tez-tez verilən suallara cavab verir.”
Qeyd edək ki, fövqəladə vəziyyət rejiminin pozulmasına görə, fiziki
şəxslər 3 000, hüquqi şəxslər isə 15 000 lari cərimə olunurlar.
1. Cərimə haqqında verilən qərardan haraya
şikayət edə bilərəm?
- Cərimələnmə haqqında verilən qərardan yuxarı səlahiyyətli orqana
(vəzifəli şəxsə) və ya birbaşa rayon (şəhər) məhkəməsinə şikayət
edə bilərsiniz .
2. Yuxarı səlahiyyətli vəzifəli şəxs
kimdir?
- Yuxarı səlahiyyətli şəxs dedikdə sizi cərimələyən polis işçisinə
vəzifəcə rəhbərlik edən insan nəzərdə tutulur. Bununla yanaşı,
daxili işlər naziri hər bir polisin yuxarı səlahiyyətli şəxsi hesab
olunur. Buna görə də şikayət etmə prosesini sizin üçün asanlaşdımaq
məqsədilə şikayətinizi birbaşa nazirin adına təqdim edə
bilərsiniz.
3. Əgər cərimədən məhkəməyə şikayət
edirəmsə, onda bu şikayətimi hansı müddət ərzində təqdim
etməliyəm?
– Əgər birbaşa məhkəməyə şikayət edirsinizsə, şikayətinizi cəriməni
qəbul etdiyiniz gündən etibarən 10 gün ərzində təqdim
etməlisiniz
4. Fövqaladə vəziyyət zamanı da məhkəməyə
müraciət edə bilərəmmi?
- Bəli. Əgər yuxarı səlahiyyətli vəzifəli şəxsə şikayət etmək
hüququnuzdan istifadə etmək istəmirsinizsə və birbaşa məhkəməyə
müraciət etmək istəyirsinizsə, onda bu şikayətinizi fövqəladə
vəziyyət zamanı da məhkəməyə təqdim edə bilərsiniz.
5. Əgər məhkəmə mənim şikayətimi təmin etməsə,
o zaman cəriməni nə qədər vaxta
ödəməliyəm?
- Məhkəmənin çıxardığı qərarı qəbul etdiyinizdən 30 gün müddətində
. Bu halda cəriməni fövqəladə vəziyyətin qüvvədə olub-olmamasından
asılı olmayaraq ödəmə məsuliyyəti daşıyırsınız.
6. Cərimə haqqında qərarı mənim qəbul etməyim
nə deməkdir?
- “Qəbul etmək” dedikdə sənədi rəsmi şəkildə götürməyiniz nəzərdə
tutulur. Polis işçisi cərimə qəbzini elə yerindəcə sizə verir .
Əgər siz çıxarılan qərarı qəbul etməkdən imtina etsəniz belə, bu
qərarı qəbul etmiş hesab olunursunuz.
7. Əgər əvvəlcə yuxarı səlahiyyətli
vəzifəli şəxsə şikayət edirəmsə, onda bu şikayətimi hansı müddət
ərzində həyata keçirməliyəm?
- Fövqəladə vəziyyət zamanı bu yöndə müxtəlif qaydalar müəyyən
edilibdir və sizin hüququnuz var ki, çıxarılan qərardan fövqəladə
vəziyyət başa çatdıqdan sonra, 10 gün ərzində şikayət edəsiniz .
Cəriməni ödəmə məsuliyyəti isə cərimədən şikayət etmək
prosedurlarından sonra yaranır.
8. Əgər yuxarı səlahiyyətli vəzifəli şəxs
mənim şikayətimi təmin etməsə, əlavə olaraq nə edə
bilərəm?
- Bu halda məhkəməyə müraciət etmək hüququnuz var. Əgər birinci
instansiya məhkəməsi (şəhər/rayon məhkəməsi) sizin tələbinizi təmin
etməzsə, bu məhkəmənin çıxardığı qərardan apelyasiya məhkəməsinə
şikayət edə bilərsiniz. Bununla da şikayət etmə proseduru başa
çatmış olur.
9. Əgər cərimədən şikayət etmək istəmirəmsə,
hansı vaxt ərzində ödəməliyəm?
- Əgər cərimədən nə məhkəməyə, nə də yuxarı səlahiyyətli vəzifəli
şəxsə şikayət etmək istəmirsinizsə, onda cəriməni elə indi də ödəyə
bilərsiniz, bununla yanaşı, fövqəladə vəziyyət başa çatdıqdan sonra
30 gündən gec olmayaraq ödəməlisiniz.
10. Vəkil xidmətindən istifadə etməyə hüququm
varmı?
- Şikayət etdiyiniz və işinizin müzakirəsi zamanı vəkilin
köməyindən istifadə edə bilərsiniz . Amma polisin sizi cərimələmək
haqqında qərarı qəbul etdiyi zaman vəkilin orada olmaması bu
proseduru dayandırmır və sizin cərimələnməyinizə əngəl törədəcək
mühit yaratmır.
11. Cərimədən şikayət olunması və
ödənməsi haqqında yuxarıda izah edilən qaydalar yalnız
karantin/izolyasiya qaydalarını pozanlaramı
aiddir?
- Bəli. Əgər siz başqa növ inzibati xəta və ya cinayət törətsəniz,
sizə başqa məsuliyyətlər də əlavə olunacaq. Məsələn, siz
cərimələnmə prosesi zamanı polisin qanuni tələbinə tabe olmasanız,
bu əlavə olaraq sizin cərimələnməyinizə və ya/və həbsinizə belə
gətirib çıxara bilər.
12. Əgər karantinin və ya/və təcrid
qaydalarını təkrarən pozsam, yenə də inzibati qaydadamı
cərimələnəcəyəm?
- Xeyr. Bu halda sizə qarşı cinayət hüquq prosesi başlayacaq.
Yuxarıda qeyd olunan halın təkrarlanması azadlıqdan məhrum etməni
nəzərdə tutur. Buna gör 3 ilədək azadlıqdan məhrumetmə cəzası
nəzərdə tutulub . Cinayət Məcəlləsinə Gürcüstan Parlamenti
tərəfindən edilən dəyişikliklərə görə, 2 maydan sonra qeyd olunan
qanun pozuntusunun təkrarlanması 6 ilədək azadlıqdan məhrum etməni
nəzərdə tutur . Bununla yanaşı, bu o demək deyildir ki, qaydanı
pozan hər bir şəxs avtomatik olaraq maksimal müddətdə (3 və ya 6
il) azadlıqdan məhrum ediləcək. Bu zaman iş məhkəməyə göndəriləcək
ki, orada da fərdi olaraq tərəfinizdən törədilən hadisənin, onun
ağırlığının, təhlükəli olmasının, sizə qarşı sürülən ittihamın
qiymətləndirilməsi baş verəcək. Yalnız bundan sonra haqqınızda
qərar qəbul ediləcək, o cümlədən, sizin günahınız sübuta
yetirildiyi halda məhkəmə cəzanızın fərdi ölçüsü haqqında
müzakirələr aparacaq.