Bu gün, 12 iyun tarixində Marneuli Bələdiyyə Məclisinin iclası
keçirilib. Bələdiyyə Məclisinin deputatı Rəhim Əsgərov istefa edib
və onun deputat mandatı boş qalıb.
Bələdiyyə Məclisinin bu gün baş tutan iclası zamanı boş qalan
deputat mantatına yeni deputatın təyin olunması müzakirə edilib.
2017-ci ilin yerli özünüidarə seçkiləri zamanı Vahid Milli Hərakat
partiyasından Marneuli bələdiyyə məclisinə proporsional siyahıda
ikinci sırada yer alan Rafiq Cəfərovun deputat olması müzakirə
edilib.
Rafiq Cəfərov kimdir?
Rafiq Cəfərov Vahid Milli Hərəkat partiyasının üzvüdür. Onun 59
yaşı var. Algeti kəndində yaşayır, ailəlidir, iki övladı var.
Rafiq Cəfərov 2002-ci ildə Marneuli Bələdiyyə Məclisinin Alget üzrə
deputatı olub. Daha sonra Bələdiyyə Məclisinin sədri vəzifəsində
çalışıb. 2014-cü ildən 2017-ci ilədək təkrar Vahid Milli Hərakat
partiyasından Marneuli Bələdiyyə Məclisinin deputatı olub. 2017-ci
ilin yerli özünüidarə seçkilərində Rafiq Cəfərov Vahid Milli
Hərakat partiyasından proporsional siyahıda ikinci sırada yer
alıb.
Rafiq Cəfərov "Marneuli" radiosu ilə söhbəti zamanı Bələdiyyə
Məclisinin növbəti iclasında iştirak etməyi düşündüyünü bildirdi.
O, deyir ki, gələcək planlardan danışmaq hələ tezdir.
"Əvvəlcə mən Bələdiyyə Məclisinin iclasında iştirak
etməliyəm. Yəni Bələdiyyə Məclisinin vəziyyəti ilə tanış olmalıyam.
Rayon büdcəsi ilə tanış olmalıyam. Görülən və görüləcək işlərlə
tanış olmalıyam. Əvvəlcədən heç nə deyə bilmərəm. Tanış olduqdan
sonra deyə bilərəm ki, mənim planlarım nə olacaq", –
Rafiq Cəfərov dedi.
Xatırladaq ki, Marneuli Bələdiyyə Məclisinin VMH-dan olan üzvü
Rəhim Əsgərov rüşvət alma ittihama ilə 2019-cu ilin 28 mart
tarixində saxlanılmışdı. Daha sonra 2019-cu ilin 25 dekabr
tarixində hakimin qərarı əsasında məhkəmə zalından azadlığa
buraxılıb. Rəhim Əsgərovun deputatlıq mandatı 11 mart tarixindən
dayandırılıb.