Bu gün, 24 may tarixində Marneuli Bələdiyyə Məclisinin iclası baş
tutub. İclasda gündəlikdə nəzərdə tutulmuş 12 məsələ müzakirə
olunub. Mövzulardan biri Marneuli bələdiyyəsinin 2020-ci ildə
həyata keçirdiyi müqavilələrə həsr olunub.
Görülmüş işlər barədə Alqı-Satqı Şöbəsinin rəhbəri Zanda Kvançiani
hesabat verdi. O, qeyd etdi ki, tender prosesləri zamanı maraqlı
fakt qeydə alınıb. Məsələ üç milyondan artıq dəyəri olan layihə ilə
bağlıdır. Layihədə Algeti, Təzəkənd, Əzizkənd, Hacisakənd, Kürtlər,
Ambarovka, Algeti Şərabçılıq Təsərrüfatı və Keşəli kəndlərinə
ehtiyat içməli suyun verilməsi işləri həyata keçirilməli idi.
Tenderdə 11 namizəd iştirak edib. Onlardan ikisi qeyri-qanuni
hərəkətinə görə tenderdən uzaqlaşdırılıb. Tbilisi şəhərində
qeydiyyatda olan “Elva” MMC şirkətinin filialının imzası saxta
imiş.
“Namzidi uzaqlaşdırdıq. Bundan sonra o qara siyahıya
düşdü. Şirkət bunlara görə bizi şikayət edib və nəticədə bizə
bəraət qazandıq. Buna görə namizədin hesabından 30 000 lari
çıxarıldı”, – Zanda Kvançiani dedi.
Həmin tenderdə iştirak etmiş “Pasaj-Gürcüstan” şirkəti də tenderdən
kənarlaşdırılıb. Zanda Kvançianinin sözlərinə görə, qeyri-qanuni
hərəkətinə görə qeyd olunan şirkətə də 30 000 lari borc öhdəliyi
qoyulub. Ancaq iş hazırda məhkəmədədir.
“Namizəd olan şirkət sənədlərin təqdimatı zamanı rus
dilində sənədlər təqdim etdi. Bu iş təcrübəsi ilə bağlı idi. Sənəd
notarius tərəfindən təsdiqlənmişdi. Biz bu sənədləri yoxladıq ki,
nə dərəcədə düzgün yerinə yetirilib. Aydın oldu ki, qeyd olunan
sənəd “Pasaj” MMC-yə aid deyilmiş. Sənədi elə-belə yükləyiblər və
real olaraq notarius tərəfindən təsdiqlənməmişdi. Bunu təsdiqləmək
üçün qeyd olunan notariusla əlaqə saxladıq. Yazılı şəkildə müraciət
etdik ki, bu nə dərəcədə həqiqətə uyğun idi. Onlardan cavab aldıq
ki, həqiqətə uyğun deyilmiş. Ona görə namizədi kənarlaşdırdıq.
Onlar da bizi şikayət etmişdilər və yenə də biz bəraət qazandıq.
Hazırda həmin namizəd məhkəməyə şikayət edib və növbəti prosesləri
gözləyirik.”
Qeyd edək ki, meriya 2020-ci ildə tender elan etmişdi. Tenderdə
“Qza”(Yol) MMC qalib gəlib. Qeyd olunan şirkət meriyaya işləri 2
677 777 lariyə həyata keçirməyi təklif edib. Pulun 95% dövlətin, 5%
isə Marneuli meriyasının büdcəsindən ayrılıb. Layihə başa
çatıb.
Bələdiyyə Məclisinin bu gün baş tutmuş iclasında müzakirə olunan
məsələlər arasında idmançıların həvəsləndirilməsi də var idi.
Marneuli meriyası idmançılara – Luka və Kote Kapanadzelərə, eləcə
də onların məşqçilərinə pul mükafatı təqdim edəcək.