30 dekabr tarixində Ənvər Hümbətovun adının əbədiləşdirilməsi ilə
bağlı Marneuli meriyasına təqdim olunan müraciətə hələ ki cavab
gəlməyib.
Bu barədə “Marneuli” radiosu ilə söhbəti zamanı mülki fəal Samirə
Bayramova məlumat verdi. Onun sözlərinə görə, meriyaya təqdim
olunan petisiyanın müzakirəsi ilə bağlı onlara məlumat
verilməyib.
“Sadəcə Marneuli meriyasına təqdim olunan petisiyanın qeydiyyata
alınması məktubunu almışam və bu da adi hüquqi prosesdir. Ancaq
həmin petisiyanın nə zaman müzakirə olunacağı ilə bağlı məlumat
verilməyib. Petisiyada qeyd olunmuşdu ki, hər hansı görüş və yaxud
ilkin müzakirə üçün yerin seçilməsi məsələsini birlikdə müzakirə
edə bilərik. Görüşlərin bizim və cəmiyyət nümayəndələrinin iştirakı
ilə olması daha məntiqlidir. Çünki Marneuli sakinləri bu petisiyaya
təqdim olunan tələb və arqumentlərə görə imza
atıblar”, – Samirə Bayramova dedi.
Bayramovanın dediyinə görə, onlar mərkəzi və yerli hakimiyyətlə
əməkdaşlıqda həmişə problemlər yaşayıblar.
“İllərdir ki, istər mərkəzi, istərsə də yerli
hakimiyyət olsun, onlarla əməkdaşlıqda həmişə problem yaşamışıq.
Sanki onların cəmiyyətlə əməkdaşlığa və onların təşəbbüslərinə
qarşı ciddi kompleksləri var. Onlar ictimaiyyət və QHT sektoru ilə
işləmək istəmirlər. Onlar üçün bu maraqlı deyil və yaxud sadəcə
məcburi formada məsələləri dinləyirlər. Amma qəbul etmirlər.
Ümumiyyətlə, onlar düşünürlər ki, ictimai fəallıq və QHT hər hansı
bir siyasi xal qazanmaq istəyir. Onlar bu cür bir komplekslərə
malikdirlər. Hümbətovla bağlı petisiyanı qanun çərçivəsində
Marneuli Bələdiyyə Məclisinə ünvanlamışam. Ümidim var ki, Bələdiyyə
Məclisində yer alan deputatlar tərəfindən məsələ müsbət şəkildə
müzakirə olunacaq, çünki bu bizim ümumi Gürcüstanın milli
dəyəridir, hər hansı sıradan bir hadisə deyil. Əks təqdirdə bu
rayonda yaşayan insanların böyük narazılığına və təəssüfünə səbəb
ola bilər”, – Samirə Bayramova bildirdi.
Mülki fəal təəssüflə qeyd edir ki, müharibədən 30 il keçməsinə
baxmayaraq, əvvəllər bu məsələ ilə bağlı heç bir müraciət
olunmamışdı.
“O, Marneulidən olan milli bir qəhrəmandır. Bunun adını
ucaldaq. Mən düşünürəm ki, bu cür addımların atılması vacibdir.
Gürcüstanda inteqrasiya prosesi aktiv şəkildə həyata keçirilir. Mən
ümid edirəm ki, bu təfərrüatları və ümumi dəyərləri nəzərə alarlar.
Ümid edirəm ki, nöqsanlı hissələr yaradıb, petisiyanı ləğv
etməzlər. Çünki qanuni olaraq bunun heç bir əsası yoxdur. Ola
bilsin ki, bu məsələni heç müzakirə də etməsinlər. Amma hər şey
qanun çərçivəsində yazılıb və imzalar atılıb. Petisiya ilə bağlı
Gürcüstan prezidenti ilə görüşdə geniş söhbətimiz oldu və bu
təşəbbüs onun çox xoşuna gəldi. Bu günə kimi bu adamın adının heç
bir yerdə keçmədiyindən təəssüf hissi keçirdi və sonra rəsmi olaraq
Gürcüstan prezidentinə rəsmi dəstək üçün məktub göndərildi.
Almaniya səfirinin Marneuliyə səfəri zamanı bu məsələ barədə də
səfirə məlumat verdim. Səfir də bu məsələyə çox sevindi və ümid
etdi ki, Marneuli Bələdiyyəsi bu təşəbbüsü qəbul
edər”, – Bayramova qeyd etdi.
Hümbətovun adının əbədiləşdirilməsi üçün Rustavi meriyasına da
müraciət edən Samirə Bayramova bildirir ki, hələ ki oradan da cavab
gəlməyib.
“Ənvər bəy Marneulidə doğulsa da, sonralar Rustavidə
yaşayıb. Orta təhsilini orada tamamlayıb. Onun təhsil aldığı
məktəbdə onun adına bir lövhə quraşdırılması və Rustavi şəhərinin
tarixi mədəni irsinə əlavə olunması ilə bağlı Rustavi şəhər merinə
məktub ünvanlanıb. Onun ailəsi və Marneuli sakinləri onların
imzaları ilə onun adının əbədiləşdirilməsini səbirsizliklə
gözləyirlər”, – Samirə Bayramova dedi.
Qeyd edək ki, 29 dekabr tarixində Abxaziya
müharibəsində şəhid olmuş Ənvər Hümbətovun adının əbədiləşdirilməsi
üçün başladılan petisiya Marneuli meriyasına təqdim olunub.
Petisiyanın təqdim olunmasında mülki fəallarla birlikdə Hümbətovun
ailə üzvləri də iştirak etmişdilər. Petisiya çərçivəsində 1300 imza
toplanıb və Marneuli meriyasına təqdim olunub.
Hümbətovun ailə üzvləri petisiyanın təqdim
olunmasından sonra Marneuli meri Kənan Ömərovla görüşüblər. Onlar
görüşü müsbət dəyərləndirdilər və razı qaldıqlarını
bildirdilər.
Məlumat üçün bildirək ki, Ənvər Hümbətov Marneulinin Algeti
kəndindəndir. O, Abxaziya müharibəsinin iştirakçısı olub. Hümbətov
müharibədə 25 nəfəri xilas etdiyi zaman şəhid olub.
Qeyd edək ki, Ənvər Hümbətov “Vaxtanq Qorqasali” ordeni ilə təltif
olunub. Bu isə hərbçilərə verilən ən yüksək ordendir.