Marneuli yerli özünüidarəsinin nümayəndələri 9 aprel memorialına
əklil qoyublar.
Yerli özünüidarə nümayəndələri “Marneuli” radiosuna memoriala əklil
qoyulacağı barədə məlumat verməyiblər. Meriyanın feysbuk
səhifəsində yayımlanmış məlumata görə, Algeti, Tsereteli, Tamarisi
kəndlərində memoriallara əklil qoyulub.
“Marneuli yerli özünüidarəsinin rəhbər şəxsləri Algeti,
Tsereteli və Tamarisi kəndlərində 9 aprel memoriallarına əklil
qoyublar və Vətənin bütövlüyü uğrunda həlak olanların xatirəsini
yad ediblər, 9 apreldə dünyasını dəyişənlərin yad edildiyi tədbirdə
iştirak ediblər”, – meriyanın yayımladığı məlumatda
qeyd olunub.
Marneuli yerli özünüidarəsi 9 aprel üçün əklillərin alınması ilə
bağlı fərdi sahibkar Davit Robakidze ilə sadələşdirilmiş müqavilə
bağlayıb. Meriya bir ədəd əklilə 250 lari ödəyib. Üç əklil meriyaya
750 lariyə başa gəlib.
9 aprel tarixində Marneuli Mədəniyyət Mərkəzinin təşkilatçılığı ilə
müstəqillik günü ilə bağlı tədbir də keçirilib və 9 apreldə baş
vermiş hadisələrin təsvir olunduğu foto materiallar sərgilənib.
9 aprel 1989-cu ildə Sovet ordusu Tbilisidə dinc aksiyanı dağıdıb.
Aksiyada Gürcüstan vətəndaşları müstəqillik tələb edirdilər. 9
aprel gecəsi 21 nəfər dünyasını dəyişib, 427 nəfər isə xəsarət
alıb. İki ildən sonra, 9 aprel 1991-ci ildə Gürcüstan Ali Şurası
Gürcüstanın müstəqillik aktını qəbul edib.