“Salam” platrforması Marneulidə, Aşağı Qullar kəndində əhalinin
problemlərini araşdırıb.
Təşkilatın yayımladığı məlumata görə, yerli sakinlər yolların xarab
olması, uşaq bağçasının olmaması kimi problemləri
səsləndiriblər.
Qullar əhalisi Marneuli meriyasına kəndin daxili yollarına asfalt
qatının çəkilməsi və körpünün bərpası tələbi ilə müraciət edib.
“Salam” platformasının “Marneuli” radiosuna verdiyi məlumata görə,
yerli özünüidarə Yuxarı Qullarda yol infrastrukturunun qaydaya
salınması üçün vəsaiti 2024-2025-ci ilin büdcəsində nəzərə almağı
planlaşdırır.
“Biz - "Salam"ın könüllüləri 22 oktyabr tarixində
Marneuli bələdiyyəsinin Aşağı Qullar kəndində işlədik. Kənd
sakinləri ilə söhbət zamanı onlar bizi kəndin problemləri ilə tanış
etdilər. Problemlər kəndin daxili yollarının qəzalı vəziyyətdə
olması, uşaq bağçası və məktəbəqədər təhsilin əlçatmaz olması,
kənddə uşaqlar üçün oyun meydançası və ya stadionun olmaması,
Qullar və Kürtləri əlaqələndirən (həmçinin, 10-a yaxın qonşu kəndi)
piyada körpüsünün bərpası məsələsi.
Sadalanan problemlərdən Aşağı Qullar sakinlərinin təşəbbüsü ilə
yerli özünüidarəyə kəndin daxili yollarına asfalt qatı çəkilməsi və
körpünün bərpası tələbi ilə müraciət etdik. Qeyd edək ki, Aşağı
Qullar sakinləri də bildirdilər ki, dil baryerinə görə, yerli
bələdiyyə ilə münasibət qura bilmirlər. Bu səbəbdən bu günə qədər
müvafiq qurumlara problemlərlə bağlı yazılı müraciət edə
bilməyiblər. Dövlət dili haqqında üzvi qanuna əsasən, dövlət və
bələdiyyə orqanları etnik azlıq nümayəndələrinin sıx məskunlaşdığı
regionlarda lazım gəldiyi halda ərizələri, şikayətləri qəbul
etməli, müvafiq cavabları tərcümə edilmiş şəkildə etnik azlıqlara
ana dilində verməlidirlər. Buna baxmayaraq, Kvemo Kartlinin heç bir
bələdiyyəsində vətəndaşlar bu hüquqlardan yararlana
bilmirlər”. – “Salam” yazır.
Kəndlərə səfərlər “Gənclər icmanın iştirakı üçün” layihəsi
çərçivəsində həyata keçirilir. Layihə USAİD-in vətəndaş iştirakı
proqramının dəstəyi ilə həyata keçirilir.