Marneuli Bələdiyyə Məclisinin iclasında “Gürcü Arzusu”-nun
deputatları Alqeti, Əzizkənd və Böyük Muğanlıdakı qeyri-kənd
təsərrüfatı təyinatlı
torpaq sahələrinin sonradan ambulatoriyalar tikilməsi məqsədi ilə
özkəninkiləşdirilməsini dəstəkləyiblər. Bələdiyyə Məclisi iclasında
iştirak edən müxalif partiya “Vahid Milli Hərəkat”-ın üzvləri Ramil
Əhmədov və Nərgiz Əliyeva torpaq sahələrinin “Gürcüstan Tibb
Holdinq” təşkilatına 1 lariyə verilməsini dəstəkləməyib.
“Qeyd olunduğu kimi, üç torpaq sahəsini Milli Əmlak Agentliyinə
veririk. Sonradan Milli Əmlak Agentliyi müasir tipli
ambulatoriyaların tikilməsi üçün həmin sahələri “Gürcüstan Tibb
Holdinq” təşkilatına verəcək”, – Marneuli meriyasının
Əmlak İdarəedilmə və Maddi-Texniki Təminat Xidmətinin rəhbəri Aqil
Əmircanov bildirib.
Bələdiyyə Məclisi iclasında Marneuli Bələdiyyə Məclisi sədri Amiran
Qiorqadze də tibbi ambulatoriyaların tikintisi ilə əlaqədar şərh
bildirib.
“Biz bu barədə danışdır və hökumətin yanaşması belədir
ki, bütün kəndlərdə ambulatoriyalar olsun. Olmayan kəndlərdə yenisi
tikiləcək və olan kəndlərdə müasir, Avropa standartlarına uyğun
bərpa işləri aparılacaq. Həmin ambulatoriyalarda yerli sakinlərə
ilkin tibbi yardım göstəriləcək”, – Amiran Qiorqadze
bildirib.
“Vahid Milli Hərəkat”-ın deputatları ambulatoriyaların tikilməsi
üçün “Gürcüstan Tibb Holdinqinə” torpaq sahələrinin verilməsini
dəstəkləməyib. Bundan sonra Amiran Qiorqadze Nərgiz Əliyevadab nəyi
dəstəkləmədiyini başa düşüb düşmədiyini soruşub.
“Nərgiz xanım, siz nəyi dəstəkləmədiyinizi başa
düşdünüzmü? Söhbətin nədən getdiyini başa düşdünüzmü?
Ambulatoriyaların tikilməsini istəmirsiniz?”, –
Amiran Qiorqadze.
“Detalları bilmirəm və ona görə
dəstəkləmirəm”, – Nərgiz Əliyeva.
“Yeni ambulatoriya tikilməlidir və başqa detallar nəyə
lazımdır?”, – Amiran Qiorqadze
“Layihənin detallarını bilmirəm və necə dəstəkləməli
idim?”, – Nərgiz Əliyeva
Amiran Qiorqadze və Nərgiz Əliyevanın dialoquna Bələdiyyə
Məclisinin digər deputatları da münasibət bildiriblər. Bələdiyyə
Məclisi sədrinin müavini Riçard Qiqani bildirib ki, əhalinin
“VMH”-ın üzvlərinin nəyi dəstəkləməməsi barədə məlumatı
olmalıdır.
“Əhali bilməlidir, televiziyalar buradadır, qeydə
alsınlar ki, Vahid Milli Hərəkatın deputatları kəndlərdə
ambulatoriyaların tikilməsinə qarşı çıxır. Çünki kəndlərdə
inkişafın olmasını istəmirlər, xüsusilə Nərgiz
xanım”, – Riçard Qiqani bildirib.
Nərgiz Əliyeva “Marneuli” radiosu ilə söhbəti zamanı kəndlərdə
ambulatoriyaların tikintisi üçün torpaqların
özkəninkiləşdirilməsini dəstəkləməmə səbəblərindən söhbət açıb.
“Mənim nəyinsə əleyhinə səs verməyim Cənab Amiranın
xoşuna gəlməyib, ilk növbədə niyə dəstəkləməmədiyimi izah etmək
istəyirəm. Mən kəndlərdə ambulatoriyaların tikilməsinə qarşı
deyiləm. Mən Bələdiyyə Məclisi Aparatı tərəfindən hansısa məsələlər
haqqında maksimum məlumat almamışamsa o zaman bu barədə qərar qəbul
etməyəcəyəm. Bələdiyyə Məclisi Aparatı bizə bu barədə məlumat
vermir. Bəlkə başqa kəndlərdə ambulatoriyaların tikilməsinə bu
kəndlərdən daha çox ehtiyac var? Əgər mən layihənin detalları,
perspektivləri və priroitetləri haqqında məlumat almasam, orada
həqiqətən buna ehtiyac olduğunu bilməsəm ya əlayehinə səs verirəm,
ya da səsvermədən çəkinirəm. Çünki bir daha dyeirəm, biz Bələdiyyə
Məclisi Aparatı tərəfindən məlumatlandırılmırıq, onların nəyi
planlaşdırması barədə bizə məlumat çatdırılmır”, –
Nərgiz Əliyeva bildirib.
Əliyevanın sözlərinə görə, Marneuli bələdiyyəsində tibbi baxımdan
böyük problem var, çünki kəndlərdə və şəhərdə təcili yardım
maşınlar vaxtında xəstələrin yanına gedib çıxa bilmirlər.
“Əlbəttə, mən həmişə xalqın tərəfindəyəm və heç vaxt
xalqa lazım olana qarşı çıxmaram. Mən səs vermək üçün siyasi
baxışlarıma görə əlimi qaldırmıram, mən Bələdiyyə Məclisində
vətəndaşlara lazım olan qərarları dəstəkləyirəm. Ancaq mən hər
hansı layihənin nə dərəcədə mühüm olub olmadığını bilməliyəm. Əgər
bilmirəmsə o zama dəstəkləmirəm”, – Nərgiz Əliyeva
bildirib.
Marneuli Bələdiyyə Məclisi üzvünün sözlərinə görə, torpaq
sahələrinin Gürcüstan Tibb Holdinqinə verilməsi də onun üçün
problemlidir. Çünki o, həmin holdinq haqqında məlumatlı deyil.
“1 lariyə torpaq satmalı olduqları şirkət haqqında
məlumatım yoxdur. Bu qərar əsassızdır. Bunun yerli sakinlərlə
müzakirə olunub olunmadığını bilmirik, onlar bu torpağı başqasına
vermək istəyirlərmi? Ambulatoriyalara belə ehtiyac var idisə niyə
indiyə kimi tikmirdilər? Biz bilirik ki, bizim hakimiyyət
rüşvətxorlardan ibarətdir. Onlar öz ciblərinə görə hər şeyi
satarlar, həmçinin, Marneulidə də belədir. Güman ki, onların da
hansısa mənfəəti var, çünki buna öyrəşmişik. Bidzina İvanişvilinin
hakimiyyəti sadəcə korlanıb və mən xalqın nümayəndəsi kimi heç vaxt
onların rüşvətxorluq məqsədlərini dəstəkləməyəcəyəm”,
– Nərgiz Əliyeva qeyd edib.
Marneuli Bələdiyyə Məclisindən “Marneuli” radiosuna bildirdilər ki,
kəndlərdə ambulatoriyaların tikilməsi mühümdür. Əhaliyə yerində
ilkin yardım göstərilməlidir. Bələdiyyə Məclisindən bildirirlər ki,
ilkin mərhələdə ambulatoriyalar layihələri tərtib oluna bilməzdi.
Çünki Holdinqin ambulatoriya tikmək üçün torpağı yoxdur. Gürcüstan
Tibb Holdinqinə torpaq verildikdən sonra onlar ambulatoriya
layihəsini hazırlayacaqlar və işləməyə başlayacaqlar.
Gürcüstan Tibb Holdinqi Səhiyyə nazirliyinin nəzdnində fəaliyyət
göstərən qeyri-kommersiya təşkilatıdır. Təşkilat 2020-ci ildə
yaradılıb. Holdinqin məqsədi dövlət əmlakında olan klinikaların
gücləndirilməsidir. Mövcud təcrübəyə görə, bələdiyyə Gürcüstan Tibb
Holdinqinə torpaq sahəsi verəcək, holdinq isə ambulatoriyaların
tikintisini və fəaliyyətini təmin edəcək. Holdinqin məqsədlərindən
biri dövlət əmlakında olan klinikaların gücləndirilməsi və
struktur, eləcə də tibbi xidmət baxımından beynəlxalq standartlara
uyğun olmasıdır.