“Avropalı Gürcüstan” Marneuli Dairə Seçki Komissiyasında majoritar
və proporsional siyahıdakı namizədlərini bu gün, 1 sentyabr
tarixində qeydiyyatdan keçirməyi planlaşdırır.
“Avropalı Gürcüstan”-dan Marneuli meri vəzifəsinə namizəd Əhməd
İmamquliyev “Marneuli” radiosu ilə söhbəti zamanı bildirdi ki,
günün sonuna qədər Dairə Seçki Komissiyasında siyahını qeydiyyatdan
keçirəcək. Daha sonra isə majoritar və proporsional siyahı
üzvlərinin kimliyi aydın olacaq.
“Biz kənd əhalisi ilə seçkiqabağı görüşləri qapı-qapı
prinsipi ilə həyata keçirəcəyik. Çünki koronavirus pandemiyasına
görə, böyük görüşlər keçirmək istəmirik. Eyni zamanda “Facebook”-da
canlı yayımlar edirik ki, kovidə görə dövlətə və əhaliyə hansısa
problem yaratmayaq. Biz bu yolda məsuliyyətlə
dayanmışıq.”
Marneuli meri vəzifəsinə namizədin sözlərinə görə, kəndlərdə
qapı-qapı prinsipi ilə seçicilərlə görüşlərə gələn həftədən
başlayacaqlar. Əhaliyə majoritar deputatlığa namizədlərin,
proporsional siyahı üzvlərinin kimliyi barədə məlumat verəcəklər.
Əhalini “Avropalı Gürcüstan”-ın “Gürcü Arzusu”-ndan nə ilə
fərqləndiyi ilə tanış edəcəklər, niyə onları dəstəkləməli olduqları
barədə məlumat verəcəklər.