Bu videoların çəkildiyi məkanı araşdıran ekspertlər söhbətin məhz
Xomeyninin evindən getdiyini təsdiqləyiblər
Sosial media şəbəkələrində İran İslam Respublikasının banisi
ayətüllah Ruhulla Xomeyninin ev-muzeyinin yandığını əks etdirən
videolar yayılıb.
Reuters agentliyi fəallara istinadən bildirir ki, Xomeyn
şəhərindəki evə etirazçılar od vurublar.
Agentliyin bu videoların çəkildiyi məkanı araşdıran ekspertləri
söhbətin məhz Xomeyninin evindən getdiyini təsdiqləyiblər.
Lakin yarırəsmi Təsnim agentliyi evin yanması barədə xəbəri təkzib
edib və bildirib ki, evin yaxılığında “az sayda” adamlar
toplaşıb.
Xomeyn şəhəri
Sosial mediada yayılan videolarda onlarca adamın binanın yanmasını
alqışladığı görünür.
Reuters müstəqil qaydada videoların nə vaxt çəkildiyini
dəqiqləşdirə bilməyib, amma fəalların 1500Təsvir şəbəkəsi hadisənin
noyabrın 17-də Xomeyninin doğulduğu Xomeyn şəhərində baş verdiyini
xəbər verib.
Bu şəhər paytaxt Tehranın yaxınlığındadır. Xomeyninin doğulduğu ev
sonradan onun muzeyinə çevrilib.
Xomeyni 1989-cu ildə vəfat edib.
Xomeyni küçəsindəki lövhələri qoparırlar
Onun varisi ayətüllah Əli Xameneyi hazırda ölkəni bürümüş etiraz
aksiyalarının əsas hədəflərindən biridir.
Sentyabrın ortalarında gənc kürd qadın Məhsa Əmini polisdə öldükdən
sonra başlanan etirazlarda tez-tez “Diktatora ölüm!”, “Rədd olsun
Xameneyi!” şüarları səslənir.
Təsvir saytının yaydığı başqa videolarda Sistan-Bəlucistan
ostanının Zahedan da daxil bir sıra şəhərlərində etiraz
yürüşlərinin keçirildiyi görünür.
Zahedanda keçirilən mitinqdə “Xameneyiyə ölüm!” şüraları
səsləndirilib.
Çabaharda isə adamların ayətüllah Xomeyni küçəsində onun adı
yazılmış lövhələri qopardıqları və ayaq altına atıb tapdaladıqları
görünür.
“Xameneyi, biz səni basdıracağıq”
Bu arada dövlət mediası ölkənin cənub-qərbindəki İze şəhərində 7
nəfərin dəfn mərasiminin keçirildiyini xəbər verir. Mərasimi
hakimiyyət orqanları keçirib.
Xəbərdə deyilir ki, bunlar “terror aktı” nəticəsində həlak
olanlardır.
Lakin sosial media videolarında 10 yaşlı Kiyan Pirfələk adlı
oğlanın anası uşağının təhlükəsizlik qüvvələri tərəfindən
güllələndiyini deyir.
Sosial mediada Pirfələkin dəfnində çəkildiyi iddia edilən
videolarda etirazçıların xorla “Xameneyi, biz səni basdıracağıq”
dedikləri eşidilir.
Reuters bu videoların həqiqiliyini müstəqil şəkildə yoxlaya
bilməyib.
Polis, xəfiyyə və Bəsic üzvlərinin öldürüldüyü xəbər verilir
Noyabrın 18-də Təsnim agentliyi bildirib ki, Məşhəd şəhərində
keçirilən hökumətə dəstək nümayişində iki Bəsic üzvü öldürülüb.
Bəsic ifrat mühafizəkar ictimai polis dəstəsidir.
İnqilab Keşikçilərinin internet saytında dərc olunmuş xəbərdə isə
noyabrın 17-də gecə etirazçılarla toqquşmalarda iki kəşfiyyat
agentinin öldürüldüyü bildirilir.
Bu saytdakı başqa bir xəbərə görə isə Tehranda İnqilab Keşikçiləri
Korpusunun və Bəsicin daha üç üzvü həlak olub.
Noyabrın 17-də Kürdüstan ostanında bir polsin öldürüldüyü xəbər
verilir.