Avropa Parlamenti Rusiyanı terrorizmin sponsoru olan dövlət elan
edib.
Avropalı parlamentarilər Rusiya qüvvələri və onların marionet
qüvvələri tərəfindən Ukraynada mülki şəxslərə qarşı məqsədyönlü
hücumlar və vəhşiliklərin, mülki infrastrukturun dağıdılması,
beynəlxalq və humanitar hüququn digər ciddi pozuntularının terror
aktları və müharibə cinayətləri olduğunu vurğulayıblar.
Avropa Parlamentinin məlumatında deputatların Rusiyanı “terror
vasitələrindən istifadə edən” dövlət kimi tanıdıqları deyilir.
Avropa Parlamenti Aİ və ona üzv dövlətləri müvafiq qanunvericilik
bazası yaratmağa və Rusiyanı terrorizmə sponsorluq edən dövlətlər
siyahısına əlavə etməyi nəzərdən keçirməyə çağırır.
Avropa Parlamentinin bəyanatına əsasən, bu, Moskvaya qarşı bir sıra
əhəmiyyətli çəkindirici tədbirlərlə nəticələnəcək və Aİ-nin Rusiya
ilə münasibətlərinə dərin məhdudlaşdırıcı təsir göstərəcək.
Paralel olaraq, avropalı parlamentarilər Avropa İttifaqı Şurasına
müraciət edərək “Hərbiləşdirilmiş rus “Vaqner ” təşkilatını,
“Kadırovçular” kimi tanınan 141-ci Əlahiddə Motoatıcı Alay və
Rusiya tərəfindən maliyyələşdirilən digər silahlı qruplar, milis və
marionetləri” Aİ-nin terrorçular siyahısına əlavə etməyə
çağırırlar.
494 deputat qətnamənin lehinə, 58-i əleyhinə səs verib, 44-ü isə
bitərəf qalıb.