Gürcüstan hökumətinin qərarına əsasən, ölkədə fövqəladə vəziyyət
mayın 22-dək davam etdiyindən məktəblərdə də tədris prosesi bərpa
olunmayacaq.
Hökumətin ilkin qərarına görə, məktəblərdə tədris prosesi 22 aprelə
qədər dayandırılmışdı. Lakin, Gürcüstanın Təhsil Nazirliyi
"Batumelebi"yə verdiyi açıqlamada bildirib ki, fövqəladə vəziyyət
davam etdiyindən məktəblərdə tədris prosesi bərpa edilə
biməyəcək.
Baş nazir Qiorqi Qaxarianın mətbuat katibi İrakli Çikovaninin
sözlərinə görə, Gürcüstan indi koronavirusun geniş miqyaslı daxili
yayılma mərhələsindədir və ölkə yaxın 2-3 həftə ərzində virusun pik
həddinə çatacaq.
Martın əvvəlində məktəblər onlayn tədris rejiminə keçdi. Həmçinin,
şagirdlər martın 30-dan Birinci Kanalda yayımlanmağa başlayan
Tele-məktəb dərslərindən yararlana bilərlər.
Gürcüstan ümumtəhsil məktəblərində tədris ili ənənəvi olaraq
sentyabrın 15-də başlayır. Əgər pandemiya vəziyyəti olmasaydı,
birinci sinif şagirdləri üçün yay tətili 27 may və məzun olan
şagirdlər üçün isə 20 may tarixində başlayacaqdı.