Vahid Milli İmtahanlar üçün sınaq imtahanı (6 may)
12:51 / 06.05.2020
Marneuli rayonunun Daştəpə və Sadaxlı kəndindən olan iki dost
İsmayıl Məmmədov və Nurlan Zeynalov Vahid Milli İmtahanlar üçün
sınaq imtahanı hazırlayıblar.
Onlar və onlar kimi yüzlərlə abituriyent ölkədə olan koronavirusla
bağlı vəziyyətə görə qəbul imtahanlarına hazırlaşmaqda çətinlik
çəkirlər. Yad olan onlayn tədris onlar üçün o qədər də əlverişli
deyil.
“Artıq mən özüm də hiss edirdim ki, yavaş-yavaş
zəifləmə var, misal-məsələləri əvvəlki kimi həll edə bilmirəm,
imtahandan soyuyuram və s. Hətta hər il Marneulidə keçirilən sınaq
imtahanı belə bu il keçirilmədi. Amma bir müddət əvvəl Elmar
Hacıyev tərəfindən hazırlanmış bir sınaq imtahanı çıxdı qarşıma
(burdan Elmara da minnətdarlığımı bildirirəm) və
qatıldım”, – İsmayıl Məmmədov dedi.
"Mən bu il İvane Cavaxashvili adına universitetinin
hazırlıq tələbəsiyəm və ikinci semestr imtahanlarına hazırlaşıram.
Bununla yanaşı qəbul imtahanına yenidən hazırlaşıram. Gürcüstanda
koronavirusa görə hamının da bildiyi kimi universitetlər və
hazırlıq kursları bağlanıb. Mən keçən il də hazırlaşdığım üçün
qəbul imtahanına hazırlaşmaq o qədər də çətin olmadı, evdə özüm
hazırlaşdım. Amma universitet imtahanlarına hazırlaşmağa az-çox
təsir göstərdi. Davamiyyəti olaraq online dərslərimiz olur,
lektorlar da əllərindən gələni edirlər. Amma bunu anladım ki, Gürcü
dilini öyrənmək üçün praktika şərtdir!" - Vüqar
İlyasov dedi.
Qeyd edək ki, sınaq imtahanı 80 (40 verbal, 40 riyazi) sualdan
ibarət olacaq və 6 may saat 16:00 da “Facebook”da “Borçalı
tələbələr platforma” səhifəsində paylaşılacaq və 3 saat 30 dəqiqə
vaxt veriləcək. Bitirən tələbələr qeyd etdikləri cavabları
“Facebook” vasitəsilə Nurlan Zeynalova, yaxud İsmayıl Məmmədova
göndərə bilərlər.
Qeyd edək ki, verbal hissə 2009-2019 illərində imtahana düşən
suallardan, riyazi hissə isə bu günə kimi qəbul imtahanına heç
düşməyən suallardan ibarət olacaq.