Marneulili Zəkəriyya Məmmədov təqaüdlə Macarıstanın “Debrecen”
universitetində Biznesin İdarəedilməsi fakültəsinə qəbul olub.
Məmmədov “Marneuli” radiosu ilə söhbəti zamanı uşaq yaşlarından
bəri ən böyük xəyallarından birinin xaricdə təhsil almaq olduğunu
dedi. Onun sözlərinə görə, təhsil almaq üçün Avropanın müxtəlif
ölkələrində fəaliyyət göstərən universitetləri araşdırıb.
“Mən hər zaman xaricə getmək, xaricdə təhsil almaq
istəyirdim. İndi Macarıstanda “Debrecen” universitetinə qəbul
oldum. 100 faizlik qrant və həmçinin təqaüd qazanmışam. Mən bilirəm
ki, xaricdə karyera qurmaq imkanı daha çoxdur. Uşaq yaşlarımdan
Gürcüstanda ali təhsil almaq kimi bir fikrim olmayıb. Mənim marağım
və məqsədim tamam fərqli olub”, – deyə Zəkəriyya
Məmmədov bildirdi.
İmtahanın çətinliklərindən danışan Z.Məmmədov bildirdi ki, qəbul
olmaq üçün o, bir neçə mərhələdən keçməli olub. Zəkəriyya ingilis
dilində onlayn görüşlərdə iştirak edərək, riyaziyyat fənnindən
imtahan verib və motivasiya məktubu yazmalı olub.
“İmtahan çətin idi. 3 mərhələdən ibarət oldu. Bu
mərhələni keçdikdən sonra. İlk olaraq mən Gürcüstanda motivasiya
məktubu yazdım. Mən burada test edilmək üçün dəvət aldım və həmin
mərhələdən keçdim. Sonra mən Macarıstandakı universitetə onlayn
yolla riyaziyyat fənnindən imtahan verdim. Həmçinin universitetdə
oxuyacağım illərdə planlarım və gələcək məqsədlərimlə bağlı onlayn
görüşüm baş tutdu. Orada mənə oxuyacağım fakültə ilə bağlı suallar
ünvanlandı.”
Zəkəriyya Məmmədov gələcəklə bağlı yerinə yetirmək istədiyi
arzularının çox olduğunu bildirdi. O, gələcəkdə öz biznesini qurmaq
fikrinin də olduğunu dedi.
Qeyd edək ki, Məmmədov universitetə qrant əldə etmək üçün 86 baldan
56 bal toplamalı olduğu halda 72 bal toplayıb.