Marneuli bələdiyyəsinin uşaq bağçalarında qeydiyyatın birinci
mərhələsi başa çatıb. İki məktəbəqədər təhsil müəssisəsində
uşaqların sayı müəyyən edilmiş saydan artıqdır.
4 saylı bağça 2021-2022-ci il üçün yalnız 100 uşaq qəbul edə bilər.
Ancaq bundan əlavə 35 artıq uşaq qeydiyyatdan keçib. 3 saylı
“Çiora” bağçasında isə qəbul ediləcək uşaqların maksimum sayı 120
nəfərdir. Ancaq həmin bağçada 240 uşaq qeydiyyatdan keçib.
“İkinci mərhələ 20 avqustdan 31 avqust tarixində qədər
davam edəcək. Sonra siyahılar tərtib olunacaq. Ancaq hələ vəziyyət
belədir ki, üç və dörd saylı bağçalara müəyyən edilmiş saydan artıq
uşaq qeydiyyatdan keçib. Düşünürük ki, Qızılhacılı və şəhərin 1
saylı bağçası açılanda vəziyyət qaydasına düşəcək. Hələ ki,
siyahımız yoxdur, ikinci mərhələnin bitməsini
gözləyirik”, – Uşaq Bağçaları Birliyinin rəhbəri Zaur
Kərəmov bildirdi.
3 saylı uşaq bağçasının rəhbəri Ketevan Minadze “Marneuli” radiosu
ilə söhbəti zamanı bildirdi ki, onların bağçasında qeydiyyatdan
keçmək istəyənlərin sayının çox olması təəccüblü deyil. Ancaq belə
vəziyyət heç vaxt olmayıb. Mövcud vəziyyət Qızılhacılı və şəhərin 1
saylı bağçasının bərpasına görə yaranıb. Marneuli Uşaq Bağçaları
Birliyində güman edirlər ki, 1 saylı bağça noyabrda, Qızılhacılı
bağçası isə sentyabrda açılacaq.
Uşaq Bağçaları Birliyinin rəhbərinin sözlərinə görə, indiki
mərhələdə Marneuli kəndlərinin bağçalarında və hazırlıq
mərkəzlərində qeydiyyat problemi yoxdur. Marneuli miqyasında
ümumilikdə 14 bağça fəaliyyət göstərir. Zaur Kərəmovun sözlərinə
görə, Marneuli bələdiyyəsində 6 yeni bağçanın tikintisi
planlaşdırılır. Ancaq nə zaman tikiləcəyi məlum deyil.