Bu gün, 15 sentyabr tarixində Marneuli bələdiyyəsinin Tsopi kənd
ictimai məktəbi 2022-2023-cü tədris ilinə yeni binada başlayıb.
Kənddə yeni məktəbi Gürcüstan Bələdiyyələrin İnkişaf Fondu Təhsil
İnfrastruktur Proqramı çərçivəsində tikib.
Marneuli meri Kənan Ömərov “Marneuli” radiosu ilə söhbəti zamanı
bildirdi ki, bu gün Tsopi ictimai məktəbi təntənəli şəkildə
açılıb.
“Bildiyiniz kimi, bu gün çox mühüm gündür. Marneuli bələdiyyəsində
8 yeni inşa edilmiş və 3 tam bərpa edilmiş məktəbdə təhsil prosesi
bərpa olundu. Biz bu gün Tsopi ictimai məktəbinin açılışını etdik.
Hamını, xüsusi ilə də birinci sinif şagirdlərini, onların
valideynlərini yeni tədris ilinin başlaması münasibəti ilə təbrik
edirəm. Hamıya uğurlu il arzulayıram”, – Kənan Ömərov
bildirdi.
Marneuli merinin açıqlamasına görə, bələdiyyə miqyasında ümumilikdə
74 ictimai məktəb fəaliyyət göstərir və onların hamısında təhsil
prosesi maneəsiz bərpa olunub.
Marneuli Bələdiyyə Məclisinin sədri Amiran Qiorqadze də Tsopi
ictimai məktəbinin açılışında iştirak edirdi.
“Bu gün çox mühüm güdür. Mən yeni tədris ilinin
başlaması ilə əlaqədar olaraq hamını təbrik edirəm. Biz Qızılhacılı
və Tsopi kəndində olduq, yeni tikilmiş, bərpa edilmiş məktəbləri
nəzərdən keçirdik. Qızılhacılı ictimai məktəbi bu gün rəsmi olaraq
açıldı. Məktəb 450 uşaq üçün nəzərdə tutulub və 3 milyon lariyə
qədər pul xərclənib. Bizim ölkədə Avropa standartlarına uyğun olan
məktəb göstərir ki, bu çox irəli atılmış addımdır, bizim şagirdlərə
yüksək, keyfiyyətli və tam təhsil almaq şəraiti
yaradır”.
Bələdiyyələrin İnkişafı Fondunun Təhsil İnfrastrukturu proqramının
meneceri Tamar Kardava bildirdi ki, bu gün fond tərəfindən
Gürcüstan miqyasında 22 ictimai məktəb açılıb.
“Bütün şagirdləri təhsil ilinin başlaması münasibəti
ilə təbrik edirəm və uğurlar arzulayıram. Kvemo Kartli regionunda
ümumilikdə biz 22 məktəbin tikinti-bərpasını həyata keçiririk.
Ümumilikdə 91 milyon larini əhatə edir. Aydındır ki, problemlər də
var, ancaq bu problemlər üzərində işləyirik və fəal şəkildə
qoşulmuşuq. Bütün problemləri bilirik, həlli üçün də
çalışırıq”, – Tamar Kardava bildirdi.
Tsopi ictimai məktəbində 80 şagird təhsil alır. Yeni bina isə 150
uşaq üçün nəzərdə tutulub.