Marneuli bələdiyyəsinin Saimerlo kənd bağçasının rəhbəri
vəzifəsindən azad edilib.
Bu barədə məlumatı Uşaq Bağçaları Birliyinin rəhbəri Zaur Kərəmov
təsdiq etdi və bildirdi ki, Aza Xarşiladzenin bağça rəhbərliyindən
azad edilməsinə səbəb bağçanın idarə edilməsi prosesində yol
verilən səhvlərdir. Sonuncu səbəb isə bir neçə gün əvvəl, içməli
suyun olmamasına görə bağçanın bir günlük bağlanması ilə
əlaqədardır.
“Siz bilirsiniz ki, bağçanın bağlanması nə deməkdir və
özbaşına belə qərar qəbul etmək yolverilməzdir. Ona qədər bir neçə
nizam-intizam məsələləri ilə bağlı xəbərdarlıq edilmişdi və qərar
qəbul etdik ki, onunla əməkdaşlığı dayandıraq. Bu daxili mətbəxdir
və bunların hamısını açıq deyə bilmərəm. Onun səlahiyyətlərini
həmin bağçanın tibb bacısı icra edəcək”.
Aza Xarşiladze “Marneuli” radiosu ilə söhbəti zamanı onun azad
edilməsi ilə bağlı Uşaq Bağçaları Birliyinin arqumentini ədalətsiz
adlandırır. O, qeyd edir ki, bağçada içməli su probleminin
yaranması onun təqsiri deyil. Uşaq bağçalarına verilən
xəbərdarlıqdan sonra birlik özü vaxtında reaksiya göstərməli
idi.
“Su ilə əlaqədar mən heç bir yalan danışmırdım. Çünki
əvvəlcədən su idarəsindən heç bir xəbərdarlıq olmamışdı və növbəti
gün adi şəkildə suyun gələcəyini gözləyirdik. Səhər Soso İnadzeyə
(Uşaq Bağçaları Birliyinin rəhbər müavini) zəng vurdum, saat 08:27
idi. Bildirdim ki, kənddə su yoxdur və nə isə tədbir görsünlər,
uşaqları evə göndərməyək, vaxtında cavab vermədi. Ona qədər isə
uşaqlar getmişdilər və bir neçə uşaq qalmışdı. Bağça yenə də
bağlanmamışdı, ancaq yekun nəticədə belə yazılıb ki, uşaqların
əksəriyyətini bağçaya qəbul etməmişik. Bunun üçün məni
günahlandırırlar ki, bir gün əvvəl niyə xəbər etməmişəm. Əvvəlki
gün adi rejimdə keçdi, su gəlirdi, günorta yeməyi də hazır idi və
su kəsildi. Sonra isə birtəhər yola verdik, mən düşünməmişdim ki,
növbəti gün su gəlməyəcək. Ona qədər bir dəfə xəbərdarlıq almışdım.
Mənim Zaur və ya Edişerə qarşı heç bir etirazım yoxdur, Sosoya
qəlbim qırılır ki, məsələni çətinləşdirib. Bağçada su gəlməyəndə
bizim uşaqları evə buraxmaq hüququmuz var. Bu mənim işdən azad
edilməyimə səbəb olmalı deyildi, onlar mənən bunu etməməli
idilər”.
Aza Xarşiladzenin məktəbəqədər təhsil müəssisəsində 26 illik iş
təcrübəsi var.