Dmanisi rayonunun Aşağı Orzuman məktəbinin müəllimi və direktor
səlahiyyətini icra edən İslam Məmmədov “Gürcüstanın Əməkdar
Müəllimi” adına layiq görülüb.
Mükafat Təhsil Nazirliyinin “Müəllimlərin Peşəkar İnkişafı Milli
Mərkəzi” tərəfindən verilib.
İslam Məmmədov 1977-ci ildən Gürcüstanda pedaqoji fəaliyyətlə
məşğul olur. O, “Marneuli” radiosu ilə söhbəti zamanı bildirdi ki,
onun mükafata layiq görülməsi gözlənilməz olub.
“Bu mənim üçün gözlənilməz oldu. O mənada ki, mən
inanmırdım ki, müstəqillik dövründən bu yana qədər Dmanisidə
mükafata layiq görülən azərbaycanlı olsun. Bu mükafata layiq
görülən ilk azərbaycanlı mənəm. Bu günə qədər bu cür mükafat heç
kimə təqdim olunmamışdı. Mən düşünürdüm ki, bu mükafat heç kimə
verilə bilməz. Mən özlüyümdə iddialı idim. Yetişdirdiyimiz
tələbələrimiz sosial medialarda və telefon zəngləri ilə mənə
deyirdilər ki, müəllim, çoxdandır ürəyimizdə gəzdirdiyimiz arzumuz
həyata keçdi. Bu gözəl sözlər mənə o mükafatdan da qiymətli oldu.
Mən 2008-ci ildə prezident təqaüdünə də layiq görülmüşəm. Həmin il
Dmanisidə 5 nəfər prezident təqaüdünə layiq görülmüşdü, onlardan
biri də mən idim. Yeganə azərbaycanlı mən idim. Bu mükafat mənim
üçün daha əzizdir. Çünki bu bir-başa müəllim əməyinə verilən
qiymətdir. Məni bu mükafata layiq görənlərə öz təşəkkürmü
bildirirəm. Mən özüm də müəllimlərimdən öyrənmişəm və öyrətməyə də
davam edirəm. Bu mükafat məni arxayın salmır. Bu mükafatı təkcə
özümə aid hesab etmirəm, bunu kollektivimiz adına hesab
edirəm”, – İslam Məmmədov “Marneuli” radiosu ilə
söhbəti zamanı dedi.
Müəllimin mükafata layiq görülməsi Novruz bayramına təsadüf etdiyi
üçün bu onun üçün iki qat sevincli olub.
“Mükafata layiq görülən gün yağışlı bir gün idi. Martın
20-i idi. Sabahı günü məktəbimizdə Novruz bayramı keçiriləcəkdi.
Əslində biz də Novruz bayramına hazırlaşırdıq. Mənə Resurs Mərkəzin
rəhbəri zəng edib dedi ki, İslam müəllim, sizin məktəbə gəlirik.
Başqa heç nə demədi. Sadəcə onu dedi ki, müəllimləri müəllimlər
otağına yığın. Məktəbə gəldilər və birdən-birə deyəndə ki, siz
mükafata layiq görülmüsünüz – bu mənim üçün gözlənilməz oldu.
Sevincimin həddi-hüdudu olmadı. Onlar orada sertifikatı və döş
nişanını verdilər. Təbrik etdilər. Bu mənim üçün çox sevindirici
bir gün oldu. Bu ifadə bir az təvazökarlıqdan kənar da olsa, bu
mənim haqqım idi. Bu mənim əməyimin göstəricisi idi. Mən bunu
azərbaycandilli məktəblərə, azərbaycandilli müəllimlərə,
azərbaycandilli pedaqoji ictimaiyyətə verilən yüksək qiymət kimi
qəbul etdim. Dövlətimiz sağ olsun, var olsun ki, kimlərinsə başqa
cürə düşündüyü kimi yox, dövlət layiqli insanları bu cür
qiymətləndirir”, – Məmmədov dedi.
Mükafatın təqdimetmə mərasimində Dmanisi meri Koba Muradaşvili,
Dmanisi Resurs Mərkəzinin rəhbəri Maya Xmaladze və idarənin digər
əməkdaşları iştirak ediblər. Dmanisi meri Koba Muradaşvili və digər
əməkdaşlar Məmmədova və məktəbin bütün pedaqoji kollektivini
mükafat görə təbrik ediblər.
Qeyd edək ki, İslam Şamı oğlu Məmmədov 27 iyun 1956-cı ildə Dmanisi
rayonunun Aşağı Orzuman kəndində anadan olub. Orta təhsilini Aşağı
və Yuxarı Oruzman məktəblərində alıb. Məktəbi bitirdikdən sonra
1973-cü ildə ali təhsilini N. Tusi adına Azərbaycan Dövlət Pedaqoji
Universitetinin (əvvəllər V.İ.Lenin adına Azərbaycan Dövlət
Pedaqoji İnstitutu olub) riyaziyyat fakültəsində davam etdirib.
1977-ci ildə ali təhsilini bitirdikdən sonra təyinatla Gürcüstana,
doğma kəndi olan Aşağı Orzuman kəndinə qayıdaraq pedaqoji
fəaliyyətinə başlayıb. Həmin ildən bu günə qədər məktəbdə
riyaziyyat müəllimi işləyir. 1996-cı ildən kənd məktəbinə rəhbərlik
edir. Məmmədov iki dəfə Dmanisi Bələdiyyə Məclisinə deputat
seçilib. Hal-hazırda “Gürcüstan” qəzetinin Dmanisi rayonu üzrə
xüsusi müxbiridir. Qəzetdə bir sıra məqalələri dərc olunub. İslam
Müəllim riyaziyyat üzrə baş müəllimdir.