Marneuli bazarında dörd cərgədə yerləşən onlarla piştaxtada məktəb
üçün geyimlər və dəftərxana ləvazimatları düzülüb.
Məktəbin başlamasına 10 gün qalır. Marneuli bazarı alış-veriş üçün
sərfəli yerlərdən biri hesab olunur və xüsusilə məktəb hazırlıqları
zamanı yerli sakinlərdən başqa Kvemo Kartlinin digər
bələdiyyələrindən də buraya gəlirlər.
Ana İosava iki övladı ilə birlikdə Bolnisidən alış-veriş üçün
buraya gəlib. O, deyir
ki, qiymətləri öyrənmək üçün Tbilisiyə də
gedib, ancaq aşağı qiymətlərə və daha yaxşı seçim olduğuna görə,
Marneulidən almağa qərar verib. O, bildirir ki, iki uşağın məktəbə
hazırlığı 1 000 lariyə başa gəlir.
“Mən Bolnisidən gəlmişəm. Marneuli bazarından uşaqlarıma
paltar alacağam. İki uşağın geyimi 1 000 lariyə başa gəlir.
Həqiqətən də buradan alış-veriş etmək əlverişlidir. Dünən Tbilisidə
idim, heç nə ala bilmədim və buraya gəldim”, – Ana İosava
bildirir.
Manana İaşvili Marabdadan Marneuliyə alış-verişə gəlib. O,
“Marneuli” radiosu ilə söhbəti zamanı bildirdi ki, üç uşağa paltar
almağa təxminən 1 500 lari xərcləyir. Baxmayaraq ki, qiymətlər hər
yerdə bahalaşıb, Manana Marneulidə qismən güzəştli qiymətə
alış-veriş edə bilir.
“Seçim həqiqətən də böyükdür, hər qiymətə var, baxır kimin
imkanı nəyə çatır. Qiymətlər elədir ki, ucuz da, baha da ala
bilərsən. Üç uşaq gətirmişəm, 1000 lariyə üçünə də ala bilməzsən,
ən az 1500 lari lazımdır ki, paltar alıb məktəbə göndərəsən. Mən
Marabdadan gəlmişəm. Marneuli bazarı mənim üçün əlverişlidir,
doğrudur, illər ərzində burada da qiymətlər dəyişib, ancaq
Tbilisidə daha bahadır”, – Manana İaşvili deyir.
Marneuli bazarında çantaların qiyməti 25 laridən başlayır və 70
lariyə qədər dəyişir. Donların başlanğıc qiyməti 35 laridir,
pençəklər 30 laridən, şalvar 20 laridən, jaket 25 laridən,
köynəklər isə 30 laridən başlayır.
Marneuli bazarında dəftərin qiyməti 0,70 tetridən başlayır və 2
lariyə qədər dəyişir. Rəsm dəftəri 2,50 laridən, qələmlər isə 0,20
tetridən başlayır.
“Mən demək olar, hər il Marneuli bazarından paltar
alıram. Bir uşağım var, təkcə paltar, çanta almaq təxminən 600
lariyə başa gəlir. Dəftərxana ləvazimatları üçün əlavə xərc nəzərdə
tutmuşam. Deyə bilmərəm ki, burada da çox ucuzdur, ancaq Tbilisi
ilə müqayisədə burada çox yaxşı qiymətə alırıq. Çantaya 35 lari
verdim, bir şalvarı 35 lariyə, pencəyi 40 lariyə aldım. Köynəyə isə
25 lari verdim”, – kimliyini açıqlamaq istəməyən
müsahiblərdən biri dedi.
Gürcüstan miqyasında ictimai məktəblərdə 2023-2024-cü tədris ili 15
sentyabrda başlayacaq.