Marneuli bələdiyyəsinin uşaq bağçalarında 2023-2024-cü tədris ili 18 sentyabrda başlayacaq. Bu barədə Marneuli Uşaq Bağçaları Birliyinin rəhbəri Zaur Kərəmov məlumat verib. O, qeyd edib ki, məktəblərdə tədrisin 15 sentyabrda başlamasına baxmayaraq məktəbəqədər hazırlıq mərkəzləri 18 sentyabrda açılacaq. Marneuli bələdiyyəsi miqyasında indiki mərhələdə yalnız 11 bağça işləyəcək. Bu isə qeydiyyatdan keçmiş 2 000-dən artıq uşaq üçün kifayət deyil. Uşaq Bağçaları Birliyinin rəhbəri Zaur Kərəmovun sözlərinə görə, gələn ildən vəziyyətin yaxşılaşmasını gözləyirlər. O zamana qədər üç yeni bağça tikiləcək.

“Bir bağça açılmayıb (qaçıqnlar məntəqəsi) və düşünürük ki, noyabr ayında açılacaq. Eləcə də güman ki, yanvar ayından Qızılhacılı bağçası açılacaq. Uşaqların sayı artan yerlərdə bağçalar bağlanıb və ona görə də say çoxdur. Onların əməkdaşları əlavə qruplara əlavə müəllim və ya dayə olaraq keçirlər. Hər qrupda dörd nəfər (dayə və pedaqoq). Marneulidə ümumilikdə 10 bağçanın tikintisi planlaşdırılıb. Mən bildiyimə görə, bu il 3 bağça tikilir, layihə sənədləri hazırlanır. Bir bağça Candar məktəbinin yanında, biri Tseretelidə və biri də Şulaveridə olacaq”.

Zaur Kərəmov bildirib ki, bağça problemini 3 yeni bağçanın tikintisi həll etmir. Ancaq o, düşünür ki, 10 yeni məktəbəqədər təhsil müəssisəsi olarsa problem aradan qalxar.

Gürcüstanın Baş nazirinin təşəbbüsü ilə ölkə miqyasında 885 uşaq üçün nəzərdə tutulmuş bağçanın tikinti-bərpası həyata keçiriləcək. Qeyd olunan proqram çərçivəsində Kvemo Kartli regionunda cari ildə 15 yeni bağçanın tikintisi və 8 bağçanın bərpasına başlanılacaq.

Tikinti-bərpa işlərini Gürcüstanın Regional İnkişaf və İnfrastruktur Nazirliyinin Bələdiyyələrin İnkişaf Fondu həyata keçirəcək. Qeyd edək ki, dövlət büdcəsindən Marneulidə 3 bağçanın tikintisinə 10 milyondan çox pul ayrılıb.