Vaqonlarda keçən 20 ildən sonra Çanaxçı kənd ictimai məktəbinin
yeni binası istifadəyə verilib.
Müasir standartlara uyğun tikilmiş yeni məktəbdə 15 sentyabrda 3
şagird üçün ilk zəng çalınıb. Təhsil müəssisəsinin ümumilikdə 20
şagirdi var. Məktəb direktoru Manana Manukyan deyir ki, bu gün
onların çoxdankı arzuları gerçək olub.
“Yeni məktəb binası bizim şagirdlərin arzusu idi. 20 il
idi, vaqonlarda təhsil alırdıq. Yeni məktəb müasir standartlara
uyğundur. Hər şey yenidir, siniflər təchiz olunub, məktəb 60 şagird
üçün nəzərdə tutulub. Təhsil prosesi üçün yaxşı şərait çox
mühümdür. Uşaqlar tam təhsil alacaqlar. Hamını təbrik
edirəm”, – Manana Manukyan deyir.
Qeyri-gürcüdilli məktəblərin inkişafı proqramının gürcü dili ikinci
dil kimi fənni üzrə məsləhətçi müəllimi Ana Xomeriki uşaqlara gürcü
dilini tədris etməyə 2016-cı ildə vaqonlarda başlayıb. O, bu gün
bizimlə söhbəti zamanı bildirdi ki, yeni məktəb binası keyfiyyətli
təhsilin ilkin şərtlərindən biridir.
“Əlbəttə, bunlar hamısı müəllimin, eləcə də şagirdin
motivasiyasını artırır. Kənd üçün də çox ümidvericidir. 21-ci əsrdə
vaqonda təhsil prosesi aparılmamalıdır və yeni məktəb bizim üçün
çox sevindiricidir”, – Ana Xomeriki bildirdi.
Çanaxçı məktəbinin açılış mərasimində yerli özünüidarə
nümayəndələri də iştirak ediblər. Bələdiyyə Məclisinin sədri Amiran
Qiorqadze şagirdləri yeni tədris ilinin başlaması münasibəti ilə
təbrik edib və bildirib ki, bələdiyyə təhsil müəssisəsinin
tikintisinə dəstək olacaq.
“Çanaxçı kəndində yeni məktəb tikildi, müasir tipli
məktəbdir. Birinci sinifləri tədris ilinin başlamasına görə təbrik
edirəm. Sevinirəm ki, uşaqların yaxşı şəraitdə təhsilə davam etmək
imkanı var. Bizim bələdiyyədə artıq 9 yeni məktəb binası tikildi və
tikintilər yenə planlaşdırılır. Belə məktəblərin tikintisində
iştirak edən hər kəsə minnətdarlığımı bildirirəm”, –
Amiran Qiorqadze bildirib.
Məktəbin açılışında Təhsil Resurs Mərkəzinin nümayəndəsi İrma
Davadze də iştirak edirdi. O, bizimlə söhbəti zamanı bildirdi ki,
Marneuli miqyasında 20 078 şagird təhsilə başlayıb.
“Bu gün yeni bina çox xoşumuza gəldi, çox gözəl
məktəbdir. Onun tikintisi üçün 1 600 000 lari xərclənib. Vəsait
Bələdiyyələrin İnkişafı Fondu tərəfindən ayrılıb. Bələdiyyə
miqyasında 20 078 şagird məktəbə gedib. Buradan 2000 şagird birinci
sinfə gedir. Hamını təbrik edirəm və gözəl tədris ili arzu edirəm.
İnnovasiya və mədəni tədbirləri ilə dolu iliniz
olsun”, – İrma Davadze bildirdi.
Marneuli bələdiyyəsinin Çanaxçı kənd məktəbinin şagirdlərinə
2019-cu ildə vəd vermişdilər ki, vaqon məktəbi, köhnə döşəməni,
cırılmış divar kağızını, köhnə partaları, yeni, abadlaşdırılmış
təhsil müəssisəsi əvəz edəcək. Məktəbin tikintisi təxminən 5 il
idi, davam edirdi. Bir müddət işlər dayandırılmışdı.