19 sentyabr tarixində Dmanisi bələdiyyəsində yeni təmir olunmuş
Hamamlı ictimai məktəbinin açılışı olub.
Açılış mərasimində Azərbaycanın Gürcüstandakı səfiri Faiq Quliyev,
səfirliyin əməkdaşları, Dmanisi bələdiyyəsinin meri Koba
Muradaşvili, merin müavini Arif Süleymanov, Dmanisi Bələdiyyə
Məclisinin sədri Paata Quliaşvili, Dmanisi Təhsil Resurs Mərkəzinin
rəhbəri Maya Xmaladze, Gürcüstanın Azərbaycanlı Ağsaqqallar
Şurasının sədri İsak Novruzov, rayon ictimaiyyətinin nümayəndələri
və kənd əhalisi iştirak ediblər.
Dövlət tərəfindən təmir olunan ictimai məktəbdə şagirdlər üçün hər
cür şərait yaradılıb. Həmçinin məktəb binasında məktəbəqədər
hazırlıq qrupunun da açılışı olub.
Azərbaycanın Gürcüstandakı səfiri Faiq Quliyev məktəbdə yaradılan
şəraitlə yaxından tanış olub. Müəllim və şagirdləri yeni tədris
ilinin başlanması münasibətilə təbrik edib. O, Azərbaycan
dövlətinin Gürcüstanda yaşayan azərbaycanlılara göstərdiyi diqqət
və qayğıdan danışıb. Səfirin sözlərinə görə, bu cür dəstək bundan
sonra da davam edəcək.
“Yeni tədris ilinin başlaması münasibətilə hər kəsi,
şagirdləri, valideynləri, müəllimləri salamlayır və təbrik edirəm.
Arzu edirəm ki, bu il sizin hər biriniz üçün dinc və uğurlu
olsun”, – Faiq Quliyev bildirib.
Faiq Quliyev Hamamlı ictimai məktəbinə kompüter də hədiyyə
edib.
Hal-hazırda Hamamlı ictimai məktəbində 250 şagird təhsil alır.
Məmişli, Səfərli və Tqizuri kəndlərinin şagirdləri də Hamamlı
ictimai məktəbində təhsillərini davam etdirirlər.
Açılış mərasimində iştirak edən Dmanisi meri Koba Muradişvilinin
sözlərinə görə, yaxın vaxtlarda Məmişli, Səfərli, Tqizuri və digər
kəndlərdə də məktəb binaları tikiləcək və təmir olunacaq. Onun
sözlərinə görə, Hamamlı kəndində yeni uşaq bağçasının inşası da
planlaşdırılır.
“Məqsədimiz odur ki, bələdiyyənin bütün dövlət məktəbləri
infrastruktur cəhətdən sağlam olsun. Hamamlı kənd məktəbi ötən il
əsaslı təmir olunub. Sinif otaqları, hamam otaqları, dəhlizlər,
kitabxana, açıq və qapalı idman meydançası inşa edilib. Mərkəzi
istilik sistemi çəkilib. Məktəb xüsusi ehtiyacı olan insanlar üçün
adaptasiya olunub”, – Dmanisi Bələdiyyəsinin meri
Koba Muradaşvili bildirib.
Hamamlı məktəbinin açılışından sonra Dmanisi Mədəniyyət Mərkəzində
Heydər Əliyevin 100 illik yubileyi ilə bağlı konsert proqramı
təşkil edilib. Konsert proqramı Xırdalan musiqi məktəbinin iştirakı
ilə keçirilib.
Xəbərdə istifadə olunan şəkillər Dmanisi Bələdiyyəsinin
"facebook" səhifəsindən götürülüb.