28 dekabr tarixində Marneulidə, Mülki Məşğulluq Mərkəzində
müəllimlərlə görüş keçirilib.
Görüşdə azərbaycandilli məktəblərdə dərs deyən müəllimlər iştirak
ediblər. İqtisadiyyat üzrə fəlsəfə doktoru, ictimai fəal Aygül
İsayevanın sözlərinə görə, keçirilən görüşdə müəllimləri narahat
edən məsələlər müzakirə olundu.
“Müəllimlərin istəyi ilə baş tutan tədbirdə inklüziv
təhsil sistemində çalışan xüsusi müəllimlərin, pedaqoji kolleci
bitirən müəllimlərin üzləşdikləri problemlər, eləcə də müəllimləri
narahat edən digər məsələlər müzakirə edildi. Müəllimlərin fənn
imtahanını ana dilində vermək hüquqları var, ancaq belə imkanlar
inklüziv təhsil sistemində çalışan müəllimlər üçün bu günə qədər
yaradılmayıb”.
Pedaqoji kolleci bitirən müəllimlərin üzləşdikləri problemə
münasibət bildirən Aygül İsayevanın dediyinə görə, Gürcüstanın
təhsil qanunvericiliyinə əsasən müəllim olmaq üçün bakalavr
diplomunun olmasının tələb edilir.
“Bəzi müəllimlər Azərbaycanda pedaqoji kolleci
bitiriblər. Onların diplomunda ibtidai sinif müəllimi kimi işləmək
səlahiyyətlərinin olması qeyd edilib. Bu müəllimlərin bəziləri fənn
imtahanından 1 kredit toplayıb baş müəllim statusunu alıblar. Fənn
imtahanından 10 kredit toplayanlara isə status verilmir, səbəb
olaraq bakalavr diplomunun olmaması qeyd edilir. Gürcüstanın Təhsil
və Elm Nazirliyinin və Müəllimlər Evinin səlahiyyətlərini aşıb
pedaqoji kolleci bitirən müəllimlərə hansı halda status verməsi və
verməməsi bizim üçün maraqlıdır və müraciətdə bu suallar əks
etdirilib”.
Görüşdə müəllimləri narahat edən digər məsələlər də dinlənilib və
növbəti görüşün keçirilməsi ilə bağlı qərar qəbul edilib. Sonda
dövlət qurumlarına ünvanlanan müraciət oxunaraq yekdilliklə qəbul
edilib.