Bir neçə gündür çörəkxana və mağazalarda çörəyin qiyməti artıb.
Şəhla Tomayeva illərdir ki, Marneulidə çörəkxanada işləyir.
O, bildirir ki, lavaş 1 lari idi, indi isə 20 tetri bahalaşıb.
Bunun səbəbi isə son bir ay ərzində unun qiymətinin artmasıdır.
Mağazalarda çörək 10 tetri bahalaşıb. Yerli sakinlər problemlərdən
və işsizlikdən danışırlar. Sakinlər bildirirlər ki, onsuz da ağır
olan iqtisadi vəziyyətdə çörəyin qiymətinin artması əhali üçün ağır
olacaq. Darecan Kveladze Marneuli bazarında xırdavat satır. O,
deyir ki, çörəyin qiyməti artmamalıdır. Çünki çörək dəbdəbəli bir
şey deyil və hamının onu almağa imkanı çatmalıdır.
“Əhalinin əsas qismi çörəkdən asılıdır, bahalaşmalı
deyildi. İnsan geyimi, qızılı almaya bilər, ancaq çörəksiz qalmaq
olmaz. Dövlət çörəyin qiymətini artırmamalıdır”, –
Kveladze bildirdi.
Un almaq üçün getmiş alıcılar qiymətin artdığını görüblər.
Fəxrəddin Hüseynov tez-tez Marneuli bazarından un alır. O, unun
bahalaşmasına səbəb olaraq dolların məzənnəsinin artmasını görür.
Tsisana Tedorovna isə qiymətlərin artması ilə bağlı bildirir ki,
çörəyin qiymətinin artması sadə əhalini pis vəziyyətə salacaq.
“Hökumət yalnız unun deyil, bütün məhsulların qiymətini
artırıb. Kəndlilərin əməyinə qiymət verilmir, başqa nə
deyim”, – Tsisana Tedorovna bildirdi.
Roman Tsilosani bir neçə ildir ki, un mağazasında işləyir. O,
çörəyin qiymətinin iki həftədən artıqdır ki, artdığını deyir. Onun
sözlərinə görə, unu bazadan gətirib satırlar və bir kisə unda 2
lari qazancları olur.
“Bizdə un 65 lari idi. Təxminən iki həftədir 10 lari
artıb. Hər şey bahalaşıb, şəkər, düyü, günəbaxan yağı. Bir ədəd
lavaş 1,30 tetridir”, – Roman Tsilosani bildirdi.
Gürcüstanda un məhsullarının qiymətinin artması ilə bağlı
Çörəkxanalar Assosiasiyasının sədri Malxaz Dolidze bildirib ki,
çörəyin bahalaşması dünya bazarında taxılın qiymətinin artması ilə
əlaqədardır. Ölkədə çörək və un məhsulları 13,2% bahalaşıb.