Sameqrelodan Tbilisiyə gedən konvoyun birində olan millət vəkili
Ana Tsitlidzenin verdiyi məlumata görə, Samtredia yaxınlığında
"Gürcü Arzusu"-nun nümayəndələri tərəfindən etirazlarla
qarşılanıblar, həmçinin, təhqir ediliblər.
Onun sözlərinə görə, Samtrediada süpürgə tutan təxminən 40 adam
toplaşıb. Ana Tsitlidzenin sözlərinə görə, Zuqdidi Bələdiyyə
üzvləri Tazo Patsatsia, Edita Kodua və Zaza Prokopenko da bunlar
arasındadır.
Sameqrelonun müxtəlif bələdiyyələrindən "Vahid Milli Hərəkat"-ın
üzvləri və tərəfdarları, Gürcüstanın üçüncü prezidentinin sərbəst
buraxılmasını tələb edən mitinqdə iştirak etmək üçün təxminən bir
saat əvvəl Tbilisiyə gediblər.
Oktyabrın 14-də müxalifətin bir hissəsi və Gürcüstanın üçüncü
prezidenti Mixeil Saakaşvilinin azad edilməsi tələbini dəstəkləyən
insanlar Tbilisidəki Azadlıq meydanına toplaşacaqlar. Mitinqin
təşkilatçısı "Vahid Milli Hərəkat"-ın lideri Nika Meliadır.
Gürcüstanın üçüncü prezidenti oktyabrın 1-də Tbilisidə həbs edilib.
Həbsindən bir neçə saat əvvəl Mixeil Saakaşvili Facebook-da
Gürcüstanda olduğunu yazıb və tezliklə bunu sübut etmək üçün
videolar paylaşıb.
Axşam Daxili İşlər Nazirliyinin xüsusi brifinqində məlum olub ki,
Mixail Saakaşvili Tbilisidə həbs edilib.
Mixail Saakaşvili üç instansiya məhkəməsində Valeri Qelaşvili və
Sandro Qirqvlianini döyməkdə təqsirli bilinərək 6 il həbs cəzasına
məhkum edilib. Bu işlərdə məhkəmənin verdiyi qərarlar qətidir və
şikayət edilə bilməz.
Mixeil Saakaşvili Rustavi N12 saylı cəzaçəkmə müəssisəsində 13
gündür aclıq aksiyası keçirir.
Mənbə: radiotavisupleba.ge