Akustik səs-küyün icazə verilən normalarını aşan şəxs elə ilk dəfədən cərimə ediləcək
Gürcüstan parlamenti üçüncü oxunuşda İnzibati Xətalar Məcəlləsinə dəyişiklik edilməsi haqqında qanun layihəsini 80 səslə qəbul edib, ona əsasən, xüsusi mülkiyyətdə olan yaşayış evində, əmlak və ya dövlət qurumunun binasında yol verilən akustik səs-küy normalarını aşmağa görə cərimənin məbləği artırılır. Bundan başqa, qanun layihəsinə əsasən, xəbərdarlıq əvəzinə, qaydanı pozan şəxs birinci instansiyada cərimələnəcək.

Fiziki şəxs üçün cərimənin məbləği 150 lari, hüquqi şəxs və fərdi sahibkar üçün isə 1500 lari olacaq. Dəyişiklikdən əvvəl hüquqi şəxs üçün cərimə, bu halda, 500 lari təşkil edirdi.

Təkrar edildiyi halda, fiziki şəxslər üçün cərimənin məbləği 500 lari (300 lari idi), hüquqi şəxslər və fərdi sahibkarlar üçün isə 5000 lari (1000 lari idi) təşkil edəcək.

Üçüncü və hər bir sonrakı halda cərimənin məbləği fiziki şəxs üçün 1000 lari, hüquqi şəxs və fərdi sahibkar üçün isə 10 000 lari müəyyən edilir.
Texniki reqlamentlər gün ərzində tikinti və təmir işlərinə, işçilər üçün iş yerində və iş mühitində yaranan səs-küyə və qaydalarda nəzərdə tutulmuş digər müstəsna hallara şamil edilmir.

Noyabrın 16-da parlament Gürcüstanın İnzibati Xətalar Məcəlləsinə dəyişiklik edib. Qanun prezidentin imzasından sonra 15-ci gün qüvvəyə minəcək.
Mənbə: Tabula

Print ელ. ფოსტა
FaceBook Twitter Google