Gürcüstanın Milli Bankı, maliyyə sektorunda pul yuyulması və terrorizmin maliyyələşdirilməsinin qarşısının alınması qanunvericiliyinin pozulmasına dair apardığı nəzarət tədbirləri nəticəsində keçən il 961 300 lari məbləğində cərimə tətbiq edib. Bu barədə Gürcüstan Milli Bankının 2024-cü il üzrə hesabatında deyilir.

Hesabata görə, 2024-cü il ərzində çirkli pulların yuyulması və terrorçuluğun maliyyələşdirilməsinin qarşısının alınması ilə bağlı Gürcüstan qanunvericiliyinə riayət olunmasını müəyyən etmək üçün maliyyə sektorunun 36 nümayəndəsi yoxlanılıb.

Yoxlamalar zamanı aşkar edilən nöqsanların aradan qaldırılması məqsədilə, Gürcüstan Milli Bankının Pul Yuyulmasının Nəzarəti və İnspeksiya Departamenti 2024-cü ildə 6 subyektin "follow-up" tipli uzaqdan yoxlamalarını həyata keçirib.

Əhəmiyyətli olan odur ki, 2024-cü ildə beynəlxalq sanksiyalarla uyğunluq və pul köçürmələri sistemində həyata keçirilən əməliyyatların araşdırılmasına xüsusi diqqət yetirilib. Bu məqsədlə kommersiya banklarında beynəlxalq sanksiyalarla (Rusiya Federasiyası, Belarusiya, İran İslam Respublikası) uyğunluq prosesinin effektivliyi yoxlanılıb.

"2024-cü ildə, pul yuyulmasının və terrorizmin maliyyələşdirilməsinin qarşısının alınması ilə bağlı Gürcüstan qanunvericiliyinin pozulmasına görə tətbiq edilən cərimələrin ümumi məbləği 961 300 lari olub," - hesabatda qeyd olunub.

Bundan əlavə, hesabatda bildirilir ki, yerində yoxlamalar nəticəsində tətbiq edilən cərimələrdən başqa, 2024-cü il ərzində maliyyə sektoru nümayəndələrinə aktiv şəkildə korreksiyaedici tədbirlər tətbiq edilib. Aşkar edilmiş zəifliklərin dərhal aradan qaldırılması və maliyyə sektoru nümayəndələrinin uyğunluq səviyyəsinin yüksəldilməsi məqsədilə, 2024-cü ildə yerində yoxlamalar nəticəsində bir sıra tövsiyələr verilmişdir.

Hesabatda, tövsiyələrin əksəriyyətinin mikro maliyyə təşkilatlarına verildiyi və ümumilikdə 64 tövsiyə verildiyi qeyd edilib.

"Bununla yanaşı, 2024-cü ildə Moneyval, virtual aktivlər və virtual aktiv xidmət təminatçıları ilə bağlı pul yuyulması və terrorizmin maliyyələşdirilməsinin qarşısının alınması üçün aparılan tədbirləri müsbət qiymətləndirib və Gürcüstanın 15-ci tövsiyəyə uyğunluq reytinqini yaxşılaşdırıb – qismən uyğunluqdan (Partially Compliant) əhəmiyyətli şəkildə uyğun (Largely Compliant) səviyyəsinə yüksəldilib, bu isə Milli Bankın həyata keçirdiyi bir sıra nəzarət tədbirlərinin nəticəsidir," - Milli Bankın illik hesabatında bildirilir.

---

Bizi Teleqramda izləyin! Yeni xəbərlər anında kanalda! Linkə daxil olub abunə olun!
Bizi WhatsAppda izləyin! Yeni xəbərlər anında kanalda! Linkə daxil olub abunə olun!

---

Digər maraqlı xəbərlər "Marneuli" radiosunun Facebook səhifəsində.
Bizi "Telegram"da izləyin.
Şahidi olduğunuz hadisələri çəkib bizə göndərin! +995557994415

---