"Gürcüstanın Pensiya Fondu" yenilənmiş statistik məlumatları açıqlayıb. 30 aprel 2025-ci il tarixinə pensiya fondunun aktivləri 6,7 milyard lariyə, əldə edilmiş ümumi gəlirlər isə 1,6 milyard lariyə çatıb. Pensiya proqramı iştirakçılarının sayı 1 milyon 612 min nəfərdir.

2025-ci ilin aprel ayında ən yüksək gəlir dərəcəsi dinamik portfeli üzrə qeydə alınıb. Portfelin həcmi 39.1 milyon lari təşkil edir və bir ay ərzində 0.8% artım müşahidə olunub. Balanslaşdırılmış (37.7 milyon lari) və konservativ (6.6 milyard lari) portfellər isə eyni – 0.7%-lik aylıq artım göstərib.

İllik göstəricilərə əsasən, 2023-cü il avqustun 6-dan 2025-ci il aprelin 30-dək dövr ərzində dinamik portfel üzrə nominal gəlir faizi (illikləşdirilmiş) 12.1% olub. Həmin dövrdə balanslaşdırılmış və konservativ portfellərin nominal gəlirliliyi isə müvafiq olaraq 11.7% və 11.2% təşkil edib.

Bu portfellər arasındakı əsas fərq onların tərkibində beynəlxalq səhmlərin payına aiddir. 30 aprelə olan vəziyyətə görə, dinamik portfeldə səhmlərin payı 48%, balanslaşdırılmış portfeldə 30.1%, konservativ portfeldə isə 16.1% təşkil edir.

Qeyd edək ki, bu günə qədər yığım əsaslı pensiya sistemindən 18 749 nəfər yararlanıb və onlar üçün ümumilikdə 79.2 milyon lari məbləğində pensiya ödənişi həyata keçirilib.